“Чингис хааны дүрийг цаашид тогтвортой судалж салбар судалгаа болгоно”

Гэрэл зургийг MPA.mn

Монгол Улсын Соёл Урлагийн Их Сургууль, Олон Улсын Монгол Судлалын Холбоо хамтран “Монголчуудын соёлын ертөнц: Өв, үнэт зүйл, урлаг” соёл судлалын олон улсын эрдэм шинжилгээний хурлыг энэ сарын 23, 24-ний өдрүүдэд Улаанбаатар хотноо зохион байгуулах гэж байна. 

Энэхүү Олон улсын эрдэм шинжилгээний хурлын хүрээнд ОХУ, Герман, БНХАУ, БНСУ, Турк, Унгар, Франц, Полыш, АНУ, Австри зэрэг 11 орны 30 орчим, Монголын 50 гаруй эрдэмтэн оролцох талаар өнөөдөр холбогдох хүмүүс мэдээлэл өглөө. 

Тус хурлаар:

•  “Соёлын үнэт зүйл, бодлогын судалгаа”, 
• “Монголын соёлын биет болон биет бус өв”,
•  “Чингис хааны дүр тайз дэлгэц, дүрслэх урлагийн бүтээлд” гэсэн 3 салбар хуралдаан, үзэсгэлэн, урлагийн тоглолт, “Сономын Лувсанвандан” III ботийн нээлт, номын үзэсгэлэн худалдаа болох юм байна. 

Соёл Урлагийн Их Сургуулийн захирал Э.Сонинтогос ярихдаа “Аль ч орны хувьд соёлын өв уламжлалаа хойч үедээ хэрхэн өвлүүлэх, үнэт зүйлээ авч явах нь тулгамдсан асуудал болдог. Энэ хурлын үеэр бид соёлын үнэт зүйлс, хүн төрөлхтний үнэт зүйлсийн талаар голчлон ярина. Мөн Чингисийн тухай яриа сүүлийн 30 жилийн хугацаанд хүн болгоны амны уншлага болж үнэ цэнэгүй болох хандлагатай болоод байна. Үүнээс бид олон улсын тайз дэлгэц, ном зохиолын бүтээлүүдэд Чингисийн тухай юу өгүүлсэнийг ярилцах нь хурлын нэг онцлог юм. Мөн СУИС-ийн дүрслэх урлагийн инновацийн бүтээлүүдийг танилцуулах болно” гэж байв. 

СУИС-ийн Театрын Урлагийн Сургуулийн захирал Ж.Долгорсүрэн ““Мянганы хүн” хэмээн хүлээн зөвшөөрөгдсөн Чингис хааны дүрийг дэлхийн соёл судлаач, эрдэмтэд хэрхэн судалсан, судалж байгааг Монголынхоо судалгааны эргэлтэнд оруулж ирэх нь манай шинжлэх ухаанд оруулах томоохон хувь нэмэр болно. Өөр олон улс, үндэстэн Чингис хааныг өөрийн баатраа болгож, үндэстнээ тодорхойлох гэсэн оролдлогууд их байгаа нөхцөлд түүний дүрийг тайз дэлгэц, дүрслэх урлагт хэрхэн буусныг судлах нь чухал юм. Чингис хааны дүрийг цаашид тогтвортой судлах, салбар судалгаа болгох зорилготой байна” гэж байлаа. 

Монгол судлалын 2018 оны хоёрдугаар ээлжит хурлыг дотоод, гадаадын эрдэмтдийн олон улсын Монгол судлалд гүйцэтгэх үүрэг, оролцоог нэмэгдүүлэх, Монголын соёл, урлаг судлалаар мэргэшсэн залуу судлаачдыг дэмжих, залгамж халааг бэлтгэх зорилготой билээ.