"Чингисээс хойших 30 дугаар үеийн Сартуул угсаатны тухай номыг кирил бичигт хөрвүүлэн архивт хадгалууллаа"
Түүхийн судалгааны бүтээлийг Архивын ерөнхий газарт хүлээлгэн өгөх арга хэмжээ өнөөдөр боллоо.
Доктор Г.Пүрэвдорж ""Сарт гол Цэцэн Вангийн шашдир оршвой" ном болон түүнийг дагалдах түүхийн үндсэн хоёр эх бичиг болох Сартуул цэцэн вангийн хошууны тайж нарын угийн бичиг, Цэцэн сартуул вангийн хошууны хүн амын 1929 оны тооллогын эх материалыг Архивын газарт кирил бичигт буулгасан эх хувийг нь хүлээлгэн өгч байна.
Энэхүү номуудад Чингисээс хойших 30 дугаар үеийн Сартуул хошууны ноёд тайж нарын угсаа гарвал, хүн зоны тоо бүртгэл, нутаг усны нэршлийн тухай өгүүлсэн" гэлээ.
Түүхийн өв санг эрдэм шинжилгээний эргэлтэд оруулахад хувь нэмрээ оруулж байна
Академич Г.Чулуунбаатар "Шинжлэх ухааны академи, Үндэсний Архивын газартай хамтран нэгэн сонирхолтой арга хэмжээг зохион байгуулж байна.
Доктор Г.Пүрэвдорж өөрийн үндсэн ажлын хажуугаар байгаль, хүн ардыг судлах Монгол хүний эргэлзээ сонирхлынхоо дагуу "Сарт гол Цэцэн Вангийн шашдир оршвой" нэрт цогц бүтээлийг олон жилийн судалгааныхаа үр дүнд бүтээсэн байна.
Энэхүү бүтээлийг крилл бичигт буулгаснаар Архивт хадгалагдаж байгаа түүхийн үнэт өв санг эрдэм шинжилгээний эргэлтэд шуурхай оруулах, олон нийтэд түгээн сурталчлахад үнэтэй хувь нэмэр оруулж байна. Түүх угсаатны зүйн судалгааг хийхдээ арга зүйн хувьд шинэлэг хэлбэрийг ашигласан нь ололттой юм" гэлээ.
Завхан аймагт Сартуул угсааны хүмүүс оршин суудаг 11 сум бий
Завхан аймгийн Улаанбаатар хот дахь нутгийн зөвлөлийн зөвлөх Ч.Эрээнзэндавга "Ном бол чухал баримт бичиг. Өнөөдрийн Архивын Ерөнхий Газарт хүлээлгэн өгч байгаа номууд нь гурван боть. Монгол Улсын нэг хэсэг Сартуул хошууны тухай янз бүрийн яриа байдаг. Сартуулууд бол Монгол угсаатан бөгөөд Алтай хязгаараас нааш Завхан гээд хангай нуруунд суурьшиж байсан бүлэг хүмүүс.
Одоогоор Завхан аймагт Сартуул угсааны хүмүүс оршин суудаг 11 сум байгаа. Сартуул хүмүүсийг суурьшмал уу, нүүдлийн хүмүүсийн гэдгийн ялгааг "Сарт гол Цэцэн Вангийн шашдир оршвой" номын нэгдүгээр ботид гаргаж өгсөн.
Хоёрдугаар ботид Сартуул хошууны мянган тайжийн тухай гарна. Гуравдугаар ботид 1929 оны Сартуул хошууны хүн ам, малын тооллогын тухай мэдээлэл багтсан. Энэхүү ном нь дараагийн үеийнхэнд судалгааны эх сурвалж болох чухал баримт бичиг юм" гэв.
