Тэмбүүгийн халдвартай эхээс төрөлхийн тэмбүүтэй хүүхэд төрөх эрсдэлтэй

Энэ удаагийн “Оюунаа эмчийн булан” та бүхэнд хүрч байна. ЭХЭМҮТ-ийн Удам зүйн кабинетын эмч, удам зуйч, Анагаах ухааны доктор Ө.Оюунчимэг жирэмсэн эмэгтэйчүүд болон хэвлийд тань бойжиж буй урд тань хэрэгтэй тун чухал зөвлөгөөнүүдийг бэлтгэн хүргэдэг билээ.

Тэгвэл тэрбээр энэ удаад бэлгийн залгаар дамжих халдварт өвчин, тэр дундаа тэмбуугийн халдварыг онцлон, хэвлийдээ тээж буй бяцхан урд тань нөлөөлөх эсэх мэдээллийг бэлтгэжээ. Мөн та Оюунаа эмчээс асуух зүйлээ түүний https:// www.facebook. com/unshigbayar. oyunchimeg болон doctor.oyunaa@gmail.com хаягаар тодруулаарай.

Тэмбүүгийн халдвар эхээс урагт халдах магадлал 60-70 хувь

Бэлгийн замаар дамжих халдварт өвчин нийт халдварт өвчний 39-40 хувийг эзэлж байна. Бэлгийн замаар дамжих халдвар дотор тэмбүүгийн халдвар бага биш хувийг эзэлж байгаа, халдварт өвчний тайлан мэдээний чиг хандлагыг харахад сүүлийн жилүүдэд нөхөн үржихүйн насны хүмүүсийн дунд тэмбүүгийн халдварын тохиолдол нэмэгдэх хандлагатай байна.

Жирэмсэн эмэгтэйчүүд жирэмсний хяналтад эрт орж, хамрагдах ёстой шинжилгээндээ хамрагдаагүй тохиолдолд төрөлхийн тэмбүүтэй хүүхэд төрөх тохиолдол цөөн биш байна. Халдвар авсан эмэгтэй эмчилгээ хийлгээгүй, жирэмсэлсэн тохиолдолд тэмбүүгийн халдвар эхээс урагт халдах магадлал 60-70, төрсөн хүүхдийн 35-45 хувьд нь төрөлхийн тэмбүүтэй төрөх өндөр эрсдэлтэй.

Төрөлхийн тэмбүүгийн халдвар дамжих зам

Төрөлхийн тэмбүү нь тэмбүүгийн халдвартай эхээс ихэсээр дамжин урагт халдварладаг. Урагт үзүүлж болох нөлөө нь тэмбүүгийн халдварын үе шат, эмчилгээ хийлгэсэн байдал, тухайн эмэгтэйн болон ургийн дархлааны тогтолцооны байдлаас хамаарна.

Тэмбүүгийн халдвартай урагт тулгарч болох эрсдэл

• Ураг жирэмсний эрт үед зулбах
   
• Бага жинтэй төрөх, эх дотроо өсөлтийн саатал, өсөлтгүй болох
   
• Дутуу төрөх
   
• Хөгжлийн гажигтай төрөх
   
• Амьгүй төрөх
  ​

Төрөлхийн тэмбүүтэй хүүхдэд илрэх шинж

Төрөлхийн тэмбүүтэй төрсөн хүүхдэд 40-50 хувь нь өвөрмөц шинж тэмдэг илэрнэ.

• Ургийн элэг, дэлүү том байх
   
• Нярайн шарлалт ужиграх
   
• Лимфийн булчирхай үрэвсэх
   
• Арьсаар цэврүүтэй төрөлхийн тэмбүүгийн халдварын үед гарах өвөрмөц тууралттай байх
   
• Хожуу үед шуу, шагай, өвдөг, бугуй, тохойн яс сийрэгжилт эрчтэй явна.
   
• Нүд, сонсгол, төв мэдрэлийн системд өөрчлөлт гарна.

Тэмбүү өвчнийг илрүүлэх ямар өвөрмөц шинжилгээнүүд байдаг вэ

Тэмбүүг илрүүлэхэд хоёр (трепонемын бус -NTTs, трепонемын - TTs) төрлийн сорил хэрэглэж болно. Цайвар трепонемыг микрос-копиор илрүүлэх, PCR ашиглах нь хамгийн найдвартай арга байдаг.

(ТРЕПОНЕМЫН БУС СОРИЛ (RPR, SPEA): Трепонемын бус сорилыг илрүүлэх болон эмчилгээний үр дүнг тооцоход хэрэглэнэ. Харшилтай, холбох эдийн өвчин, зарим нэгэн байгалийн халдварт өвчин, аутоиммунийн өвчин үед хуурамч эерэг гарч болно. Харин хуурамч сөрөг гарах тохиолдол нь тэмбүүгийн нэгдүгээр үе нь хоёрдугаар үед шилжих үед гарч болохыг анхаарах хэрэгтэй.

ТРЕПОНЕМЫН СОРИЛ (ТРНА, ТРРА, FTA-ABS Recombinant EIA, Latex agglutination)

Трепонемын сорилыг оношилгоонд хэрэглэнэ. Лептоспироз төрлийн эмгэгийн үед хуурамч эерэг гарах тохиолдол байдаг.

Бусад шинжилгээнд ямар өөрчлөлт гарч болох вэ

-Цусанд ихэвчлэн тромбоцит, лейкоцит  эсийн тоо цөөрөх, трансаминаза, шүлтлэг фосфатаза ихсэх, гипербилирубинеми,  протромбины хугацаа уртсаж болно.

ЭМЧИЛГЭЭ: Өвөрмөц үүсгэгчийн эсрэг эмчилгээг мэргэжлийн эмчийн хяналтын дор хийгдэнэ. Дур мэдэж эмчилгээ хийх нь муу үр дагавартай.

Шинж тэмдэг илэрсэн үед та ямар арга хэмжээ авах вэ

-Мэргэжлийн эмчид заавал хандах.

-Тэмбүүгийн үүсгэгчийг илрүүлэх өвөрмөц шинжилгээг хийлгэх.

-Эмчилгээг бүрэн хийлгэж, эмчилгээний үр дүнг тооцох, шинжилгээгээр хянах.

Хосууд жирэмслэлт, төрөлтдөө бэлтгэхийн тулд юуг анхаарах вэ

Хосуудын эрүүл мэндийн боловрол, мэдлэг, хандлага харилцан адилгүй байна. Энэ харилцан адилгүй байдлыг арилгахын тулд хувь хүн өөрөө хүсэж, зорьж, ухамсартайгаар бэлгийн замын халдвар, түүнээс хэрхэн сэргийлэх, илрүүлэх талаар мэдлэг олж авах хэрэгтэй байна.

Нөгөө талаас эрүүл мэндийн байгууллага хосуудын эрүүл мэндийн боловсролыг дээшлүүлэхийн тулд байнга, тасралтгүй сургалтыг чанартай хийж байх нь хамгийн чухал байдаг. 

Хосуудын эрүүл мэндийн боловрол, мэдлэг, хандлага харилцан адилгүй байна. 

Жирэмсний хяналтад эрт орж, заавал хийгдэх шаардлагатай шинжилгээнүүдийг цаг хугацаанд нь хийлгэх нь таны төдийгүй ирээдүйн хүүхдийн чинь эрүүл өсөж, хөгжих чухал шалгуур үзүүлэлтүүдийн нэг гэдгийг бүрэн ухамсарлах ойлгох нь хамгийн гол зүйл.
Жирэмслэхээс өмнө хосууд жирэмсэн үед ядаж зайлшгүй хийгдэх шинжилгээнүүдийн талаар мэдлэгтэй байх маш чухал.

Ихэнх хүмүүс ямар шинжилгээг юуны учир өгөөд байгаагаа  ч төдийлөн ойлгоогүй, эмч л хийлгээд ир гэсэн гэх мэт хайнга байдал ажиглагддаг. 

Уул нь үйлчлүүлэгчид маань эрүүл мэндийн тусламж үзүүлж байгаа хяналтын эмчийн ажилд та өөрөө бас хяналт тавьж, харилцан хамтран ажиллах ёстой. Жишээ нь нийт хамрагдах ёстой шинжилгээнээс хэдэн шинжилгээнд хамрагдаад байгаагаа өөрөө мэдэж, тооцож, эмчтэйгээ харилцан холбоотой байх нь жирэмсний хяналт улам чанартай болж, үүний v үр дүнд эрүүл хүүхэд хүлээж авна. Эрүүл биед саруул ухаан оршино.