Хөшөөг нүүлгэхийг дэмжихгүй гэв

Хөшөөг нүүлгэхийг дэмжихгүй гэв

Улаанбаатар хотыг 2020 хүртэл хөгжүүлэх ерөнхий төлөвлөгөөний тодотгол, 2030 оны чиг хандлагыг тодорхойлох баримт бичгийн дагуу Жуулчны гудамжийн автозамыг өргөтгөн шинэчлэхээр төлөвлөлт хийсэн.

Энэ төлөвлөлттэй холбоотойгоор Чингэлтэй дүүргийн III  хороо буюу  Жуулчны гудамжид байрлах Унагатай гүү, Сарлагтай хүү зэрэг зэс хөөмөл баримлуудыг Соёлын өвийг хамгаалах хуулийн дагуу Чингэлтэй дүүргийн Самбуугийн гудамжны төгсгөл Гэсэр сүмийн уулзварт байрлуулахаар НИТХ-ын Тэргүүлэгчдийн хурлаас шийдвэрлэсэн билээ.

Харин  үлдсэн найман баримлыг шилжүүлэх хүртэл “Нийтийн үйлчилгээний Улаанбаатар нэгтгэл”  хариуцан өөрийн байгууллагын хашаанд байрлуулж хадгалах юм байна. Гэвч энэхүү шийдвэр багагүй шүүмжлэл дагуулсан юм.

Учир нь түүх дурсгалын ач холбогдол бүхий хөшөө, дурсгалыг нүүлгэн шилжүүлэх нь оновчтой бус шийдвэр хэмээн олон нийт шүүмжилж байгаа юм. Тиймээс ч дээрх  шийдвэрийн талаар иргэдийн санал, бодлыг сонслоо. 

Сонгинохайрхан дүүргийн иргэн Б.Баасан: Нэгнийхээ хийснийг нөгөө нь үгүйсгэх шаардлага байсан уу 

-Хөшөө, дурсгалыг нүүлгэн шил­­­­жүүлэхээр болсон талаар мэдээнээс сонс­сон. Гэх­дээ бүх хөшөөг нүүл­гэн, шил­­жүү­лэх­гүй юм байна гэж ойл­госон. Мэ­­дээ сонсч бай­хад за­рим хөшөө дурс­галыг бү­тээн бай­гуу­лалтын ажил­тай холбогдуу­лан нүүлгэн шил­жүүлэхээр болсон гэсэн. 

Ми­ний хувьд энэ нь маш буруу шийд­вэр гэж бодож байна. Яахав нэг та­лаас нь харахад бүтээн бай­гуу­лал­тын ажил Улаанбаатарт хэрэг­тэй юу гэвэл хэрэгтэй. Гэхдээ заавал нэг ажлыг хийх гэж нө­гөө­гийнхөө хийснийг үгүйсгэх шаард­лага байна уу, үгүй юу. Хө­шөө, дурсгал гэдэг чинь тухайн цаг үеийнхээ түүхийг өгүүлж бай­даг зүйл. Өөрөөр хэлбэл, өнөөд­рийн түүхийг маргааш бидний үр хойчид өгүүлэх зүйл байхгүй юу. Тухайн цаг үедээ хэрэгцээ, шаард­лагатай байсан болоод л хө­шөө, дурсгалыг байгуулсан байж таар­на. 

Гэтэл одоо нэг төсөл хэрэг­жүү­­лэх гэж байгаа нь энэ гээд, бү­­тээн байгуулалт өрнөж байна гээд хөшөө, дурсгалыг нүүлгэн шил­­жүүлнэ гэдэг байж болшгүй зүйл. Түүхийн хувьд ч тэр асар их ач холбогдолтой зүйлд ингэж хүндэтгэлгүй хандаж байгаа нь буруу. Энэ чинь баруун гараараа зүүн гараа огтолж байгаатай ял­гаагүй асуудал шүү дээ. Нүүлгэн шил­жүүлж байна гэдэг маань “энэ чинь шаардлагагүй зүйл, тий­мээс эндээс зайлуул” гэж бай­гаатай ялгаагүй. Тиймээс ч нө­гөө­гийнхөө хийснийг үгүйсгэж бай­гаагаас өөрцгүй. 

Баянзүрх дүүргийн иргэн Ц.Эрдэнэ-Очир: Нийслэлчүүдийн түүхийг өгүүлэх хөшөөнд гар хүрэх ёсгүй 

-Миний хувьд зарим хөшөө, дурс­галыг нүүлгэн шилжүүлэх нь буруу гэж үзэж байна. Учир нь нийслэлчүүдийн хэдэн үеэрээ харж, бахдаж, өхөөрдөж өссөн хө­шөө­­нүүд чинь түүхийн хувьд асар их ач холбогдолтой зүйл шүү дээ. Гад­наас нь харахад энгийн л нэг тө­мөр баримал, хөшөөнүүд. 

За­рим хүмүүс хөшөө, дурсгал ямар ч хэрэгцээгүй зүйл гэж ад үздэг юм билээ. Миний хувьд тийм биш. Мэдээж хэрэгтэй болоод л тодорхой хэмжээний хөрөнгө, мөнгөөр хийсэн байж таарна. Тэн­гэрээс уначихаагүй нь лавтай. Гэ­тэл цаг хугацаа, хө­дөлмөр, хөрөнгө, мөнгө зар­цуулж хийсэн зүйлд хэнд ч хэрэггүй, хог, шороо мэт хан­даж байгаад нь эмзэглэж байна. Бү­тээн байгуулалтын ажил­тай холбогдуулан ингэж шийд­вэр­лэсэн гэсэн. 

Мэдээж зам, барилга барих хэрэгтэй. Гэх­­дээ соёлын өв, дурсгал бид­ний хойч ирээдүйд хэрэгтэй шүү дээ. Миний хувьд хөшөө, дурс­га­лыг хэнд ч хэрэггүй зүйл гэж ха­­рахаасаа илүү түүх өгүүлэх ур­лагийн бүтээл, хотын өнгө үзэм­жид ч хувь нэмэртэй, хүүхэд, за­лууст ч танин мэдэхүйн ач хол­богдолтой талаас нь харж, хам­гаалаасай гэж хүсдэг юм.

Нүүл­гэсэн хөшөөнүүдийн заримыг нь “Улаанбаатар нэгтгэл”-ийн ха­­шаанд хадгална гэж байсан. Хө­шөө­­нүүдийг зориулалтын ор­чинд нь хадгалж, хулгайч нараас хам­­гаалж чадах уу гэдэг ч эргэл­зээ­тэй асуудал шүү дээ. 

Баянзүрх дүүргийн иргэн Д.Нямсүрэн: Хөшөө төмрийн хаягдал биш 

-Маш буруу алхам гэж бо­дож бай­на. Зам өргөтгөж, за­сах­тай хол­богдуулан нүүлгэн шил­жүүлнэ гэж ойлгосон. Гэх­дээ энэ бол бу­руу зүйл шүү дээ. Хөшөө, дурсгал бол зүгээр нэг төмрийн хог хаяг­дал биш. Бүгд өөр, өөрийн гэсэн түү­хийг өгүүлж байдаг. Байх ёс­той га­зартаа байж л байг. 

Бид­нээс ямар хоол нэхээд байгаа биш. Асуудлыг арай өөрөөр шийд­вэр­лэж болохгүй байсан юм болов уу. Нүүлгэсэн хөшөөнүүдийг өөр газар аваачихаар ямар ч ач хол­богдолгүй болчихно. Тухайн газартаа ямар нэ­гэн түү­хийг өгүүлэх зорил­гоор байр­­луул­даг. 

Хэн нэгэн ур­ласан хө­шөөгөө тэвэрч явж бай­гаад энд байр­луулъя гээд тавь­чих­даг­гүйтэй л адил. Тэгэхээр энэ бүхэн на­рийн асуу­дал юм шүү. Нарийн төлөвлө­гөө­ний да­гуу гаргасан шийдвэр гэж бо­дож байна. НИТХ-ын хур­лаар хэлэл­цүүлсэн юм чинь тэр олон хүний санал, бодол эрх биш нэ­гийг бодсон байх гэж найдаж байгаа. 

Баянзүрх дүүргийн иргэн Б.Энхтунгалаг: Зөв гэж бодож байна     

-Миний хувьд хотын унаган иргэн. Тиймээс ч төрөлх хотоо жил ирэх бүр өнгөжин, тэлж, хөг­жөөсэй гэж боддог. Хөшөөг нүүл­­гэн, шилжүүлэх асуудлаар мэт­­гэлцэж байхыг телевизийн сув­­гаар үзсэн. Миний хувьд энэ бол зөв шийдвэр. Үүнийг хэт туйлш­­раад нэг тал руу нь хэвийл­гээд байх шаардлагагүй. 

Шаардлагатай бол нурааж, буулгаж, нүүлгэн, шилжүүлэх эрх нь хотын удирдлагуудад бай­гаа. Замыг өргөтгөх ажлын хү­рээнд гарсан шийдвэр юм би­лээ. Ганц хөшөөг харж суух нь нийс­лэл­чүүдэд хэрэгтэй юу, замаа өргөтгөөд түгжрэлгүй замаар зор­чих нь хэрэгтэй юу. Тэгээд ч зөв­хөн “Жуулчдын гудамж”-ны хө­шөөг ярьж байгаа болохоос биш Улаан­баатарын хөшөөнүүдийг бүг­дийг нь нүүлгэнэ, нураана гэж яриа­гүй. 

Тиймээс асуудлыг аль болох бүтэх талаас нь харж байвал сайн гэж боддог. Түүнээс биш нэг шийд­вэр гаргахад л болохгүй, бү­тэх­гүй гэж шүүмжилж, эсэр­гүүцээд байвал бид хэзээ ч урагш­лахгүй. Мэдээж хотын удирд­лагууд биднээс арай илүүг харж, тоо­­цоолсон л байгаа. Ер нь бид али­ваа шинэчлэлийг хүлээж авч сурмаар юм шиг санагддаг. Ихэвч­лэн буруутгаж, шүүмжилж бай­гаа харагдах юм. 

Сүхбаатар дүүргийн иргэн Т.Жүгдэрнамжил: Хөшөөнүүдийг “оршуулж” байгаагаас өөрцгүй 

-Түүхийн ач холбогдолтой зүйлс гэж бодож байна. Жуулчны гудамжинд хэчнээн хөшөө байна, тэд ямар түүх өгүүлж, нийслэлийн өнгө үзэмж, соёлын өвд ямар байр суурь эзэлж байна вэ гэдгийг ан­хаа­ралдаа авах хэрэгтэй. Сүүлийн үед хөшөөнүүдийг хүмүүс буул­гах хэрэгтэй ярьдаг болж. 

Энэ олон хөшөөгөөр яах юм, хө­шөө барьж байхаар сургууль, цэ­цэр­лэг бариасай ч гэж байх шиг. Үнэндээ бол нийслэлд хө­шөө нь ч хэрэгтэй, сургууль ч хэ­рэг­тэй, зам ч хэрэгтэй. Аль нэ­гийг нь устгаж, үгүй болгох, ач холбогдлыг нь бууруулах за­маар асуудлыг шийдвэрлэж бо­лох­гүй. 

Хөшөөнүүдийг өөр га­зарт байрлуулна гэж байсан. Тэг­вэл өөр газарт аваачихаар ту­хайн хөшөө ямар ч ач холбог­дол­гүй болчихно. Яг л Чин­гисийн нэрэнд Сүх жанж­ны талбай дарагдсан шиг. Сүх­баатарын талбай гэж байхад бүгд л Сүх жанжны хөшөөнд ан­хаар­лаа хандуулдаг байсан. Гэ­тэл одоо Чингисийн талбай бол­гочи­хоор тэнд Сүх жанжны хө­шөө байх шаардлагатай юу гэдэг асуудал тулгарч байна. Ле­ниний хөшөөг буулгасан. Одоо хаа­чив. 

Бас л түүхийн нэгээхэн түү­хийг өгүүлэх л хөшөө шүү дээ. Одоо Жуулчны гудамжны хөшөө­нүүдийг нүүл­гэнэ гэж байна. Тэр Сар­лагтай хүүгийн хөшөө чинь тэн­дээ л зохимжтой, үнэ цэнтэй, ач хол­богдолтой. Шал өөр газар аваа­чихаар ямар ч зохицолгүй л харагдана. Жаахан муу­хайгаар хэлвэл, хөшөөнүүдийг нүүл­гэж, нэг газарт төвлөрүүлэх нь “оршуулж” байгаагаас өөрцгүй. Миний бодол ийм л байна.