Бэлэгний утга учир алдагдаж байна
Цагаан сар гэхээр хамгийн түрүүнд хүний гар цайлгах зүйлээ хэрхэн бэлдэх вэ, хаанаас авах, үнэ ханш ямар байгаа бол гэх олон асуулт гарч ирдэг.
Гурав хоногийн дараа цагаан сар болох гэж байгаа учраас гар цайлгах бэлгийн талаар иргэд ямар бодолтой байгааг сонслоо.
Бэлэгний утга учир алдагдаад байна
Сүхбаатар дүүргийн иргэн Э.Цэвэлмаа:
-Эрт дээр үеэс цагаан сараар орж ирсэн хүмүүсийн гарыг цайлгах бэлгийг өгч ирсэн уламжлалтай. Энэ дагуу Цагаан сарыг тэмдэглэн өнгөрүүлдэг.
Гэхдээ сүүлийн жилүүдэд бэлэгний утга учир жаахан алдагдаад байгаа юм болов уу гэж боддог.
Яагаад гэхээр хүн бүр нэгнийхээ дээр гарах гэсэн мэт элдэв зүйлийг нэг нэгэндээ өгч байгаа нь учир дутагдалтай болж байна. Миний хувьд цагаан сарын бэлгээ бэлдэж дуусаагүй.
Гэхдээ үндэсний үйлдвэрийн бэлгээ авах гэхээр жаахан үнэтэй юм. Тэгэхээр яах аргагүй хямд хятад барааг сонгохоос өөр аргагүй болж байна. Дотооддоо үйлдвэрлэсэн барааг хүнд өгөх санаа иргэн бүрт л байгаа. Гэхдээ үнийг нь жаахан бодолцвол зүгээр санагддаг.
Бэлэг гэдэг зүйлийг нэг их ойшоодоггүй
Сүхбаатар дүүргийн иргэн Д.Рэнцэн:
-Ах нь 12 хүүхэдтэй айлын том нь. Манай гэрийнхэн 10 гаруй жилийн өмнөөс цагаан сараар архи хэрэглэхгүй, бэлэг өгөхгүй гэсэн нэгдсэн журам гаргаж, өнөөг хүртэл үүнийгээ мөрдөж байна.
Жил бүр 110-130 хүн нэг газар цугларч цагаан сараа тэмдэглэдэг болсон. Харин бусад хүмүүст бол гарын бэлэг өгдөг. Гэхдээ хавтгайрсан байдлаар бус. Манай ахмадууд дээр үед хүний гарыг цайлгах, бэлгэдлийн зүйл өгдөг байсан тухай ярьдаг. Миний хувьд ч үүнийг мэддэг.
Тийм учраас би энэ бэлэг гэдэг зүйлийг нэг их ойшоодоггүй. Сүүлийн жилүүдэд Эрээн рүү мөнгөө гаргахаас дотооддоо мөнгөө үлдээх санааг ярьж, хэрэгжүүлж эхэлж.
Энэ нь маш зөв асуудал ч эсрэгээрээ дотоодын барааны үнэ өндөр байгаа учраас бас л асуудал болж байгаа юм.
Дотооддоо үйлдвэрлэсэн бүтээгдэхүүнийг сонгох санаатай
Сүхбаатар дүүргийн иргэн Д.Норов:
-Анхнаасаа уламжилж ирсэн үндэсний баяр учраас үүнийгээ л дагаж яваа нь өнөөдрийн энэ байдал болж байх шиг. Дээр үед юм бүхэн ховор байсан учраас оёдлын утас бэлгэнд өгдөг байлаа.
Одоо үед юм бүхэн элбэг болсон болохоор янз бүрийн зүйл өгдөг болж.
Миний хувьд цагаан сарын бэлгээ бэлдэж хараахан дуусаагүй байна. Аль болох үнэ хямд зүйлийг сонгож байгаа.
Өөрийн, дотооддоо үйлдвэрлэсэн бүтээгдэхүүнийг сонгох санаатай хичээж байна. Гэхдээ заримдаа болж өгөхгүй юм.
Монгол үндэсний уламжлалаа алдаж байгаагийн илрэл
Сүхбаатар дүүргийн иргэн Л.Пунсалмаа:
-Өмнө нь настай хүн, хүүхэд хоёрт гар цайлгах бэлэг өгдөг байлаа. Гэтэл одоо эх зах нь олдохгүй хүн бүрт л гарын бэлэг өгдөг болсон.
Энэ нь надад онцгүй санагддаг. Үүнээс гадна хэдэн жилийн өмнөөс ахмад хүмүүстэй мөнгө барьж золгож байгаа нь надад үнэхээр таалагддаггүй юм.
Өнөөдөр боломжтой, боломжгүй хүн олон байгаа. Хүн бүрийг дагаад мөнгө бариад золгоод байвал эдийн засаг талдаа хэцүү.
Нөгөө талаас Монгол үндэсний уламжлалаа алдаж байгаагийн л нэг илрэл шүү дээ. Гэхдээ энэ тал дээр хүн бүр л өөр өөр бодолтой байгаа байх.
Ахмадууд, хүүхэд хоёрыг хүндэтгээд бэлэг өгч байвал зүгээр
Баянзүрх дүүргийн иргэн Б.Тайван:
-Уг нь ахмадууд, хүүхэд хоёрыг хүндэтгээд бэлэг өгч байвал зүгээр юм болов уу.
Тэгэхээр иргэд маань ч гэсэн өөр өөрийн зүгээс үүнд анхаарч уламжлалт баярын утга учрыг алдагдуулахгүй байвал сайн.
Гадны эрээн бараан, хэн хүнд нэг их хэрэг болохгүй зүйлийг өгөхөөс урьтаж, дотоодын үйлдвэрлэлээ дэмжвэл улс оронд эргээд хэрэгтэй. Наад зах нь манай өөрийн оронд үйлдвэрлэсэн оймс худалдан авсан ч нэмэр л болж байгаа шүү дээ.
Үүнийг л бодолцох нь зөв байх.
Өөрийн эдийн засагт дарамт болохгүй бэлэг солилцох нь зөв
Баянгол дүүргийн иргэн Ц.Туяа:
-Монголын цагаан сар гэдэг зүйлийг л бодох хэрэгтэй. Ах дүү, хамаатан саднаараа жилд ганц удаа уулзаж, ураг төрлөө мэдэлцдэг шүү дээ.
Тийм болохоор өөрийн эдийн засагт нэг их дарамт болохгүй бэлэг солилцохыг зөв л гэж хэлмээр байна.
Сүүлийн үед шүүмжлэл дагуулсан нэг зүйл байдаг нь ахмадуудтай хадагтай золгох бус мөнгөөр золгож байна гэх зүйл.
Үүний тухайд энэ нь хувь хүний л асуудал байх.
Алгын чинээ жаахан даавуун дээр чихэр, ёотон тавиад өгдөг байлаа
Сонгинохайрхан дүүргийн иргэн Л.Пүрэвсүрэн:
-Эрт дээр үеэс уламжлагдаж ирсэн учраас их бага хэмжээний гар цайлгах зүйл байх.
Биднийг бага байхад алгын чинээ жаахан даавуун дээр гурван чихэр юм уу, ёотон тавиад өгдөг байлаа. Өөрөөр хэлбэл, уламжлагдаж ирсэн ёсны дагуу хүний гар цайлгаж байгаагийн нэг хэрэг.
Гэтэл одоо үед бие биеийнхээ дээр гарах гэж өөрсдийгөө жаахан хүндрэлд оруулж байх шиг байна.
Үүнийг нь далимдуулаад хувийн хэвшлийхэн ч бараа бүтээгдэхүүнийхээ үнийг нэмж байна. Бараа бүтээгдэхүүний үнэ өсөхөөр төр рүү дайрдаг.
Гэтэл хувийн компаниуд өөрсдийн бизнесийг эрхэлж байгаа учраас төр үүн рүү ороод байх нэг их утгагүй байх.
Цагаан идээгээр гар цайлгадаг байлаа
Сүхбаатар дүүргийн иргэн Б.Нямдулам:
-Ахмад настнаа хүндэтгэх, өв соёлоо авч яваа бидний нэг том баяр. Харин бэлгийн тухайд бид заавал эд материал гэхээс илүү сайхан сургаалийн үг хайрлах, ахуй соёлоо таниулах гэх мэтээр байж болох шүү дээ. Түүнээс биш нэг нэгний дээр гарах гэж мөнгө барьж золгох утгагүй зүйл байж болохгүй. Миний хувьд одоо нас 60 гарч байна.
Бидний багад хадаг барин золгож, ахмадууд сайхан ерөөлийн үг хэлж, цагаан идээгээр гар цайлгадаг байлаа.
Одоо бол их л нүсэр болж. Өөрөөр хэлбэл, бид өөрсдийн зовж олсон мөнгийг Эрээн рүү л гаргаад байна. Нөгөө талаас энэ мөнгөө дотооддоо үлдээх гэхээр үндэсний үйлдвэрийн бараа бүтээгдэхүүний үнэ арай өндөр байх жишээний. Иргэдийн хувьд мөнгөндөө тааруулаад л бэлгээ сонгож байгаа шүү дээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
