Нэг мл шүлс 100 сая орчим бичил биет агуулдаг тул шүлс, нус, цэрээ ил задгай хаяхгүй байхыг НЭМҮТ зөвлөв
Олон нийтийн газар хаясан шүлс, нус, цэр нь хэдэн мянган эрүүл хүнд халдвар тараах аюултайг Нийгмийн Эрүүл Мэндийн Үндэсний Төв (НЭМҮТ)-өөс сэрэмжлүүллээ.
Судлаачид нэг мл шүлсэнд 100 сая орчим бичил биет агуулагддаг болохыг олж тогтоосон бөгөөд хүмүүс 24 цаг тутамд 100 тэрбум хүртэлх микробыг залгидаг гэх тооцоо бий.
Иймд олон нийтийн газарт амны хаалт зүүж, нэг удаагийн салфетик болон хувийн алчуур хэрэглэхийг зөвлөж байна.
ХӨСҮТ-ийн Тандалт судалгааны албаны халдвар судлаач их эмч Т.Алтан-Ембүү "Нус, цэрээ ил задгай хаях бус салфетикаар арчих соёлтой болох хэрэгтэй байна. Хүн болгон өөрийн гэсэн нусны алчууртай явдаг хандлагаа сэргээцгээе.
Гэртээ орохдоо гадуур өмссөн гутлаа тайлах хэрэгтэй. Ингэхгүй бол хүүхдүүд газар тоглох, бохирдлыг мэдэхгүй учраас гараа амандаа хийх, улмаар өвчин тусах магадлал ихэсдэг" гэдгийг мэдээлж байсан.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
