Монгол Улсын Ерөнхийлөгч У.Хүрэлсүх, Австралийн Холбооны Улсын Амбан захирагч Саманта Мостин нар өнөөдөр албан ёсны уулзалт хийж дараах сэдвүүдээр санал солилцсон талаар Ерөнхийлөгчийн тамгын газраас мэдээллээ. 

Ерөнхийлөгч, Амбан захирагч нар харилцаа, хамтын ажиллагааны өнгөрсөн 50 гаруй жилийн ололт, амжилтаа дүгнэн, цаашид шинэ агуулгаар баяжуулан, боловсрол, уул уурхай, хөдөө аж ахуй зэрэг боломжит бүхий л салбарт өргөжүүлэн хөгжүүлэхийн төлөө буйгаа илэрхийлсэн байна. 

Харилцаа, хамтын ажиллагаа 2007 оноос хойш “Өргөтгөсөн түншлэл”-ийн хүрээнд хөгжиж ирснийг талууд сайшааж, ойрын хугацаанд харилцааны түвшнийг шат ахиулан “Иж бүрэн түншлэл”-ийн түвшинд хүргэхээ нотолжээ. 

Ерөнхийлөгч У.Хүрэлсүх Австралийн Амбан захирагчийн түвшинд 30 гаруй жилийн дараа болж буй айлчлал харилцаанд шинэ хуудас нээж буйг онцолсон байна. 

Австрали нь ардчилал, хүний эрх, эрх чөлөө, зах зээлийн эдийн засгийг эрхэмлэсэн нийтлэг үнэт зүйлс бүхий Монгол Улсын чухал “гуравдагч хөрш”, Энэтхэг-Номхон далайн бүс нутаг дахь ойр дотно түнш. Мөн харилцаа, хамтын ажиллагааны бэлгэ тэмдэг болсон “Оюу толгой” төсөл, “Австрали-Монголын эрдэс баялгийн салбарын хамтын ажиллагааны хөтөлбөр” нь Монголын уул уурхайн эрх зүйн орчин, бодлого, зохицуулалтын тогтолцоог боловсронгуй болгох, бизнесийг өргөжүүлэн хөгжүүлэх, хүний нөөцийг чадавхжуулахад үнэтэй хувь нэмэр оруулж буйг хэлжээ. 

 

ЕТГ

Австралийн Олон улсын хөдөө аж ахуйн судалгааны төв зэрэг байгууллагатай хамтарсан төсөл, хөтөлбөр хэрэгжүүлэх талаар ярилцав 

 

ЕТГ

Амбан захирагч С.Мостин Австрали Улс нь ардчиллын нэгдмэл үнэт зүйлс бүхий Монгол Улстай хөгжүүлж буй харилцаа, хамтын ажиллагаандаа өндөр ач холбогдол өгдгийг онцлон тэмдэглэсэн байна. 

Хоёр улсын иргэд хоорондын хэлхээ холбоо жилээс жилд бэхжиж, харилцан солилцоо улам нэмэгдэн, Австрали Улсад боловсрол эзэмшсэн монгол залуус эх орныхоо хөгжил дэвшил үнэтэй хувь нэмэр оруулж буйд баяртай байгаагаа илэрхийлжээ.

Талууд боловсролын салбарын хамтын ажиллагааг улам өргөжүүлж, тэтгэлэгт хөтөлбөрийн квотыг үе шаттай нэмэх, Ерөнхийлөгчийн “Илгээлт-2100” тэтгэлэгт хөтөлбөртэй уялдуулах, Австралийн сайн дурын багш нарыг Монголд ажиллуулах, богино, дунд хугацааны сургалт хэрэгжүүлэх талаар санал солилцсон байна. 

Хоёр улс бэлчээрийн болон фермийн мал аж ахуй эрхэлдгийн хувьд уур амьсгалын өөрчлөлт, цөлжилт, хөрсний доройтол, хүнсний хангамж, аюулгүй байдал зэрэг дэлхий нийтэд тулгарч буй сорилтыг даван туулж, шийдвэрлэх нь нийтлэг зорилт гэдэгт санал нэгджээ.

Энэ чиглэлээр хамтран ажиллах, Австралийн Олон улсын хөдөө аж ахуйн судалгааны төв зэрэг байгууллагатай хамтарсан төсөл, хөтөлбөр хэрэгжүүлэх талаар ярилцсан байна. “Тэрбум мод” үндэсний хөдөлгөөн, “Хүнсний хангамж, аюулгүй байдал”, “Эрүүл монгол хүн” үндэсний хөтөлбөрийн хүрээнд үр дүнтэй хамтрах боломжийн талаар санал солилцжээ. 

Хоёр улс НҮБ болон олон улсын бусад байгууллагын хүрээнд бие биеэ харилцан дэмжиж, идэвхтэй хамтран ажиллаж ирснийг тэмдэглэж, цаашид бүс нутаг, олон улсын тавцан дахь хамтын ажиллагаагаа улам гүнзгийрүүлэн хөгжүүлэхийн төлөө байгааг харилцан илэрхийлсэн байна. 

Энэ хүрээнд Ерөнхийлөгч У.Хүрэлсүх 2026 онд Улаанбаатар хотноо зохион байгуулах НҮБ-ын Цөлжилттэй тэмцэх конвенцын оролцогч талуудын 17 дугаар бага хуралд Австрали Улсыг дээд, өндөр түвшинд оролцохыг урьжээ. 

 

ЕТГ