АНУ-ын хоккейн эрэгтэй шигшээ баг 92 жилийн дараа дэлхийн аварга боллоо

Хоккейн насанд хүрэгчдийн Дэлхийн Аварга Шалгаруулах Тэмцээн (ДАШТ) энэ сарын 2-ноос 25-ныг дуустал Шведийн Стокхольм болон Данийн Хернинг хотод боллоо.

16 улс оролцсон тус тэмцээнд АНУ-ын баг шигшээд Швейцарыг нэмэлт цаг сунгаж, 1:0-ээр ялснаар алтан медаль хүртэв. Сэм авгын хоккейчид 1933 онд Чехэд явагдсан ДАШТ-д түрүүлснээс хойш 92 жилийн дараа дэлхийн аварга болсон юм.

Америкчууд 1960 (ДАШТ-ийг хамтад нь зохион байгуулсан), 1980 оны олимпод түрүүлснээс хойш анхны том тэмцээний алтан медаль авч буй нь энэ.

Тэд хамгийн сүүлд 1956 оны шигшээд ялагдаж байсан бол түүнээс хойш 1962, 1996, 2004, 2013, 2015, 2018, 2021 онд хүрэл медаль зүүсэн билээ.

Тоглолтын цор ганц гоолыг "Баффало"-гийн довтлогч Тэйж Томпсон оруулсан юм. 

Швейцарчууд хэсгийн шатанд 19 оноо авснаар тэргүүлсэн. Ингэхдээ АНУ-ын багийг 3:0-ээр буулган авсан ч шигшээд дийлсэнгүй.

Түүхэндээ ДАШТ-д түрүүлж үзээгүй "Ла Нати" сүүлийн хоёр жил дараалан мөнгөн медаль зүүлээ. Тэд ДАШТ-ээс 5 мөнгө, 6 хүрэл медальтай болж байна.

Харин хүрэл медалийн төлөө зохион байгуулагч хоёр улс хоорондоо хүч үзэж, баялаг түүхтэй шведчүүд ээлжит медалиа авсан юм.

Даруухан даничууд ДАШТ-д 57 удаа оролцохдоо медальд хамгийн ойртсон нь энэ аж.

ДАШТ-ий шилдэг тоглогчоор Швейцарын хаалгач Леонардо Женони тодров. Нутгийнхаа даруухан "Цуг" клубын хаалгыг манадаг 37 настай эр Швейцараас ДАШТ-ий үнэ цэнтэй тоглогч болсон гурав дахь эрхэм боллоо. Энэ шагналыг 2013 онд хамгаалагч Роман Жоси, өнгөрсөн жил довтлогч Кевин Фиала нар авч байв.

Сэтгүүлчдийн санал асуулгаар ДАШТ-ий шилдэг багийг тодруулсан.

• Хаалгач: Леонардо Женони, Швейцар
• Хамгаалагч: Зак Веренски, АНУ
• Хамгаалагч: Дин Кукан, Швейцар 
• Довтлогч: Давид Пастрнак, Чех
• Довтлогч: Элиас Линдхёлм, Швед
• Довтлогч: Ник Олесен, Дани