Могойд 200 удаа хазуулсан АНУ-ын иргэнд могойн хорын эсрэг дархлаа бий болжээ

АНУ-ын иргэн Тим Фриде сүүлийн 18 жилийн турш 200 удаа могойд хазуулснаас гадна зориудаар хамгийн аюултай 700 гаруй төрлийн могойн хорыг өөрийн судсанд тарьсны үр дүнд маш ховор дархлаатай болжээ.

Тэрбээр эхэндээ могойтой аюулгүй харьцахын тулд өөртөө дархлаа бий болгох зорилгоор энэ ажлыг эхлүүлсэн юм байна.

Харин одоо түүний цуснаас маш олон төрлийн могойн хороос нэг зэрэг хамгаалах боломжтой эсрэг бие гаргаж авах боломжтой болсныг судлаачид мэдээлжээ.

Тэд саяхан Фридегийн цуснаас авсан эсрэг биеийг амьтан дээр туршаад амжилттай болсон юм байна.

Жил бүр дэлхий даяар 140,000 орчим хүн могойд хазуулсны улмаас амиа алддаг юм.

Одоогоор тодорхой зарим төрлийн могойн хорын эсрэг эмчилгээ байдаг бол иж бүрэн хамгаалах арга байдаггүй байна.

“Дэлхий дээр хэн нэгэн олон төрөл зүйлийн могойн хорыг саармагжуулагч эсрэг биеийг бий болгосон бол энэ нь тэр юм байна гэдгийг би ойлгоод шууд хандсан” гэж Тим Фридетэй хамтран ажиллаж буй биотехнологийн Centivax компанийн гүйцэтгэх захирал Жэйкоб Гланвилл ярьжээ.

“Эхний удаа залгахдаа би ‘энэ нь эвгүй сонсогдож магадгүй, гэхдээ би таны цусыг авмаар байна’ гэж түүнд хэлсэн” гэж тэр дурссан байна.

Фриде үүнийг нь зөвшөөрснөөр судалгаа эхэлж байжээ.

 

Улмаар судлаачид Дэлхийн Эрүүл Мэндийн Байгууллагаас зарласан манай гарагийн хамгийн аюултай 19 могойг туршихаар сонгосон байна.

Эдгээр могойн хорыг Фридегийн эсрэг биетээр дархлаажсан хулганууд дээр туршихад 13-аас нь бүрэн хамгаалж, зургаагаас нь хагас хамгаалж байжээ.

Туршилтыг хэрхэн явуулсан талаар дэлгэрэнгүй мэдээллийг Centivax компани анагаах ухааны Cell сэтгүүлд нийтлүүлсэн байна.

Одоо тэд эсрэг биеийг улам сайжруулж, нэмэлт бодис ашиглах замаар хамгаалалтын хүрээг нь өргөжүүлэхийг зорьж байгаа гэнэ.

“Миний бодлоор ойрын 10-15 жилийн дотор бид могойн бүх төрлийн хорын эсрэг үйлчилдэг зүйлийг гаргаж авч чадна” гэж судалгаанд оролцсон Колумбын Их сургуулийн профессор Питер Квон тайлбарлажээ.

“Би хүн төрөлхтний төлөө ийм зүйл хийж чадсандаа маш их баяртай байна. Би өөрөөрөө бахархаж байна” гэж Фриде сэтгэгдлээ ярьсан байна.

Эх сурвалж: BBC