Илон Маск өөрийгөө Буддатай зүйрлэжээ

Дэлхийн тэргүүн баян Илон Маск өчигдөр Трампын засаг захиргаанд гүйцэтгэж буй ажил үүргийнхээ талаар мэдээлэл өгөхөөр зарим хэвлэл мэдээллийн байгууллагын төлөөлөгчидтэй уулзжээ.

Тэрбээр төсвийн үр ашигтай байдал, хэмнэлт хариуцсан Doge (Department of Government Efficiency) нэртэй агентлагийг удирдаж байгаа юм.

Гэхдээ Маск тавдугаар сараас эхлэн уг ажилд оролцох оролцоогоо эрс багасгаж, бизнестээ төвлөрч ажиллахаар болсон байна.

Сэтгүүлчид түүнээс өөрийнх нь эзгүйд Doge үргэлжлүүлэн ажиллаж чадах эсэхийг асуухад “Буддизмд Будда хэрэгтэй байсан гэж үү? Түүнийг өнгөрсний дараа хүч нөлөө нь буурсан гэж үү?” хэмээн хариулжээ.

Хэдийгээр Маск өөрийгөө Буддатай зүйрлэсэн хэдий ч Doge агентлагийнхаа ажлын үр дүнд тийм ч сэтгэл хангалуун бус байгаагаа нуугаагүй байна.

Энэ талаар Нью Йорк Таймс сонины сэтгүүлч Жонатан Свон “101 хоногийн өмнөхтэй харьцуулахад Илон Маскийн ярианы өнгө илүү итгэлгүй сонсогддог болсон байна” гэж дүгнэн бичжээ.

Doge-ийг анх байгуулахдаа Маск нэг их наяд долларыг төсвөөс хэмнэх зорилго тавьж байсан байна.

Харин сая тэр ярихдаа ердөө $160 тэрбум орчмыг хэмнэсэн бөгөөд Вашингтоны илүү их дэмжлэггүйгээр энэ зорилтыг хэрэгжүүлэх “маш хэцүү” байсныг хүлээн зөвшөөрчээ.

“Энэ нь засгийн газар болон конгресс хэр их өвдөлт мэдрэхийг хүсэж байгаагаас шууд шалтгаалах юм байна. Үүнийг хийж болно. Гэхдээ үүний тулд маш олон гомдлыг шийдвэрлэх хэрэгтэй” гэж Маск ярьсан байна.

Тэр бас холбооны засгийн газрын ажиллах хүчийг цомхотгохдоо чухал ажил мэргэжлийн хүмүүсийг алдаа гарган халж байснаа хүлээн зөвшөөрчээ.

Хэдийгээр Вашингтонд байх хугацаа нь цаашдаа багасах ч Цагаан ордон дахь ажлын өрөөгөө хадгалж үлдэх бодолтой байгаагаа Маск ярьсан байна.

“Энэ өрөө маань цонхтой боловч түүгээр агааржуулалтын төхөөрөмжөөс өөр юу ч харагддаггүй. Гэхдээ энэ нь намайг буудахад хэцүү болгодог байх. Doge бол амьдралын хэв маяг юм” гэж Маск сэтгүүлчдэд ярьсан нь өөрийгөө хэр их эрсдэлтэй, олны хэл аманд өртөх ажил хариуцдагийг илэрхийлсэн хэрэг бололтой.

Эх сурвалж: CNN