Украины дайныг одоогийн фронтын шугамын дагуу зогсоох саналыг Путин гаргасан тухай FT мэдээлжээ

АНУ-тай явуулж буй энхийн яриа хэлэлцээний хүрээнд ОХУ-ын ерөнхийлөгч Путин одоогийн фронтын шугамын дагуу Украины дайныг зогсоох санал гаргасан тухай Их Британийн Financial Times сонин уг асуудалд ойр ажилладаг албаны эх сурвалжуудаас эш татан мэдээлжээ.

Энэ сарын эхээр Санкт Петербург хотод Трампын тусгай элч Стив Виткоффтой уулзахдаа Путин ийм санал гаргасан гэнэ.

Ингэхдээ одоо Оросын цэрэгт эзлэгдээд байгаа Украины дөрвөн мужийн Киевийн хяналтад үлдсэн хэсгийг Москва нэмж нэхэхгүй байх амлалт өгсөн гэжээ.

Өмнө нь Украины дорнод болон өмнөд бүсийн Донецк, Луганск, Запорожье, Херсон дөрвөн мужийг бүхэлд нь өөртөө авах нөхцөлийг Оросын тал тулгаж байсан юм.

Харин АНУ-ын тал үүний хариуд 2014 онд ОХУ өөртөө нэгтгэсэн Крымийн хойгийг хүлээн зөвшөөрөх санал тавьж магадгүйг эх сурвалжууд мэдээлсэн байна.

Путиний энэ санал нь Москва дөрөв дэх жилдээ үргэлжилж буй дайны анхны зорилгоосоо ухарч магадгүй эхний шинж тэмдэг болж байгаа юм. 2022 оны хоёрдугаар сарын 24-ний өдөр Оросын цэрэг Украины нутагт халдан довтлохдоо тус улсыг бүхэлд нь эзлэх төлөвлөгөөтэй байсан.

Нөгөө талаас Путиний энэ алхмын хариуд Трампын засаг захиргаа илүү их буулт хийх шаардлагатай болж магадгүйг эх сурвалжууд онцолжээ.

Тухайлбал үүнд Украиныг НАТО-д элсүүлэхээс бүрмөсөн татгалзах нөхцөл яригдаж болзошгүй гэнэ.

Мягмар гарагийн орой Кремлийн хэвлэлийн төлөөлөгч Дмитрий Песков дээрх мэдээг няцаасан байна.

“Одоо маш олон худал хуурамч зүйлс, тэр дундаа нэр хүндтэй хэвлэлүүдэд нийтлэгдэж байгаа тул та бүхэн зөвхөн анхдагч эх сурвалжийг сонсох хэрэгтэй” гэж Песков ярьсныг РИА Новости дамжуулжээ.

Өнөөдөр буюу Лхагва гарагт Украин, АНУ, Европын албаныхан Лондон хотод уулзах юм. Энэ үеэр Оросын талын тавьсан саналыг хэлэлцэх төлөвтэй байна.

Өчигдөр бас Путиний зөвлөх Юрий Ушаков энэ долоо хоногийн сүүлээр Трампын тусгай элч Виткофф дахин ОХУ-д ирэхээр болсон тухай дотоодын хэвлэлд ярьжээ.

Гэхдээ яг хэзээ ирэх, Путинтэй уулзах эсэх талаар мэдээлэл өгөөгүй байна.

Зарим ажиглагчид ОХУ-ын Курск мужийг Украины цэргүүдээс бүрэн чөлөөлөх хүртлээ Путин дайныг зогсоохгүй байх гэж дүгнэжээ.

Өнгөрсөн оны наймдугаар сард Украины армийн гэнэтийн довтолгоогоор эзэлж авсан Курск мужийн нутаг дэвсгэр энхийн яриа хэлэлцээ явуулахад Киевийн талд “чухал хөзөр” болж байгаа юм.

Бямба гарагт Путинтэй уулзахдаа Оросын зэвсэгт хүчний жанжин штабын дарга Валерий Герасимов тус мужийн газар нутгийн 99.5 хувийг чөлөөлөөд байгааг мэдээлж байв.

Эх сурвалж: Financial Times