Гэрэл зургийг MPA агентлагийн онцгой зөвшөөрөлтэйгөөр ашиглав

П.Батчулуун эмчид 2 жил 6 сарын хорих ял оноосон Анхан шатны шүүхийн шийдвэрийг хэвээр үлдээсэн талаар өмнө нь мэдээлсэн билээ. 

Үүнтэй холбоотойгоор тархины үхэлтэй донороос эртхэн шилжүүлэн суулгах эмчилгээний нөхцөл байдлыг мэдээлэх хэвлэлийн хурлын үеэр П.Батчулуун эмчийн өмгөөлөгч ирж, мэдээлэл өглөө. 

Өмгөөлөгч Э.Ганбат хэлэхдээ "Аливаа хэрэг маргааныг шийдвэрлэх асуудал Монгол Улсын хуулиар зохицуулагдаж, гурван шатны шүүхээр гомдлоо гарган шийдвэрлүүлэх зохицуулалттай.

Анхан болон Давж заалдах шатны шүүхийн шийдвэрт хуульчийн хувьд хууль зүй, хуульчийн ёс зүйн талаасаа хүндэтгэлтэй хандаж байгаа.

Гэхдээ үйлчлүүлэгчийн байр суурь, өмгөөлөгч нарын хууль хэрэглээний байр суурийн хүрээнд дараагийн шат буюу одоогоор Давж заалдах шатны шүүхийн магадлал гараагүй байна. Энэ долоо хоногт гарах байх. Үүний дараа Улсын Дээд Шүүх (УДШ)-д гомдол гаргах эрхтэй.

Та бүхэн мэдэж байгаачлан УДШ хэрэг маргаан бүрд гомдол болгоныг нь авч хэлэлцэж, танхимаар зохицуулдаггүй. Гэхдээ П.Батчулуун эмчийн тохиолдлын тухайд авч хэлэлцэх хуулийн зохицуулалт нь байна. 

Эрүүгийн хэрэг хянан шийдвэрлэх тухай хуулийн 40.1-д заасан дараах тохиолдлуудад Анхан болон Давж заалдах шатны шүүхээр хэргийг эцэслэн шийдвэрлэсэн ч гэсэн УДШ-д гомдол гаргасан тохиолдолд УДШ авч хэлэлцэх зохицуулалттай.

Эерэг талаараа Анхан болон Давж заалдах шатны шүүхийн шийдвэрийг УДШ хууль зүйн болон шинжлэх ухааны үндэслэлтэйгээр авч хэлэлцэж, шийдвэрлэнэ гэдэгт найдаж байна" гэлээ. 

"Энэ хэрэг, маргааны асуудал хэвлэл мэдээллийн хэрэгслээс эхлэлтэйг та бүхэн өөрсдөө мэдэж байгаа"

Үргэлжлүүлэн "Хэргийн дотоод асуудлын талаар дэлгэрэнгүй мэдээлэх эрхгүй. Энэ нь тодорхой хязгаарлагдмал хүрээтэй байна.

Хэргийн тохиолдол нь хувь хүний эмзэг мэдээлэл бөгөөд Хувь хүний нууцын тухай хуулиар хамгаалагдсан эрүүл мэндийн нууцын асуудал.

Энэ хэрэг, маргааны асуудал хэвлэл мэдээллийн хэрэгслээс эхлэлтэйг та бүхэн өөрсдөө мэдэж байгаа.

Соёлтой улс оронд эрүүл мэндийн салбартай холбоотой хэрэг, маргааны асуудал гагцхүү хууль хяналтын байгууллагаараа хянагддаг. Урьдчилан мэдээлэгдэж явдаггүй. Энэ бол эмч мэргэжилтнүүдийн асуудал, дээр нь эрүүл мэндийн салбарын нэр хүнд, үнэлэмжийн асуудал.

Эрүүл мэндийн сэтгүүл зүй гэж сэтгүүл зүй дотроо нэлээд нарийссан, суурь мэдлэг, боловсрол шаардсан сэтгүүл зүйгээ цаашид дэлхийн жишгээр хуулийн хүрээнд соёлтой, ёс зүйтэй хөгжүүлэх зайлшгүй шаардлага байгааг нэгэнт сэтгүүлчид цугласан учир хэлье" гэв.