Б.Загдсамбар: Олны талархал хүлээсэн "Хашаа" арга хэмжээг энэ жил үргэлжлүүлнэ
2025 онд нийслэл хотын 119 байршилд 8,100 метр хашаа, хайс буулгахаар урьдчилсан төлөвлөлт гарчээ.
Энэ талаар Нийслэлийн Газар Зохион Байгуулалтын Албаны кадастрын хэлтсийн дарга Б.Загдсамбар "Улаанбаатар хотод 2024 онд "Хашаа" арга хэмжээний хүрээнд нийт 224 байршлын 9,074 метр урт хашааг буулгасан юм. Уг арга хэмжээ сүүлийн таван жилд тогтвортой хэрэгжиж байна. Олны талархал хүлээсэн энэ ажлыг үргэлжлүүлнэ.
Урьдчилсан байдлаар энэ онд 119 байршлын 8,100 метр хашааг буулгахаар төлөвлөөд байна. Ирэх амралтын өдрүүдэд газар дээр нь очиж эзэмшил газраасаа хэтрүүлсэн, стандарт бус хашаатай ААН-ийн судалгааг нарийвчлан гаргана.
Ирэх дөрөвдүгээр сараас "Хашаа" арга хэмжээ эхлүүлж, хаврын улиралд багтааж дуусгана.
Хашаа, хайсыг буулгасан газар дээр тохижилтын ажил хийгдэнэ.
Улаанбаатар хотод үйл ажиллагаа явуулж байгаа ААН, байгууллагууд хашаатай байх стандарт байдаг. Төмөр, бетоноос илүүтэй ургамлан хашлагыг хийх шаардлагыг тавьдаг юм.
Газрын тухай хуулийн дагуу зөвшөөрөлгүйгээр хашаа барьсан ААН, байгууллагуудад нийтийн эрх ашгийг зөрчихгүй байх шаардлагыг тавьдаг бөгөөд биелүүлэхгүй тохиолдолд мэдэгдэх хуудас өгч албадан буулгаж байгаа. Зөрчилтэй хашааг албадан буулгахад гарсан зардлыг буруутай этгээдээр нөхөн төлүүлдэг" гэж мэдээллээ.
Харин зөвшөөрөлгүй барьсан гараашнуудыг буулгасан газар дээр авто зогсоол, амрах талбайг байгуулдаг байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
