Жагсаалтын гишүүнээс боов хүлээдэггүй шүү С.Эрдэнэбат гишүүн ээ
УИХ-ын намрын чуулган завсарласан эдгээр өдрүүдэд төрийн түшээд тойргууддаа ажиллаж буй. Тойргоос сонгогдсон гишүүд сонгогчидтойгоо уулзаж, өнгөрсөн хугацааны тайлан, ирэх чуулганд хэлэлцэх асуудлуудаа танилцуулж яваа. Гишүүдийн тойрогтоо ажиллах хугацаа сар шинийн баяртай давхацдаг тул тойргийнхоо ахмад настнуудыг гурил, будаа, хэвийн боовоор "хуурдаг" уламжлал тогтоод буй.
Гэтэл тойргоос бус жагсаалтаар сонгогдсон гишүүнээс хэн нэгэн боов боорцог хүссэн бололтой. 2024 оны УИХ-ын сонгуульд МАН-ын жагсаалтын долдугаарт бичигдэн парламентын гишүүн болсон С.Эрдэнэбат олон нийтийн сүлжээнд энэ талаар бичжээ.
Тэрбээр "УИХ-ын гишүүн болоод боов боорцог тараах ёстой гэсэн хүлээлт байгаа бол чадахгүй нь ээ уучлаарай. Тийм боломж ч байхгүй. Тийм зүйлсээ өөрсдөө худалдаад авч чадах цалин тэтгэвэр орлоготой болох эх орон нийгмийн баялгаас шударгаар хүртээх боломжуудыг л нээж өгөхөд хоёргүй сэтгэлээр ажиллая даа..." гэсэн байв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
