Кремль: Манайд ч бас газрын ховор элементийн их хэмжээний нөөц байгаа

Сүүлийн өдрүүдэд Украин улс газрын ховор элементийн нөөцөө АНУ-тай хамтран ашиглах замаар аюулгүй байдлаа хангуулах санаа ид яригдаж байна.

Тэгвэл Украинтай дайны байдалд байгаа Орос улс ч бас энэ санааг сонирхож байгаагаа илэрхийлэх болжээ.

“Америкчуудад газрын ховор металлын хэрэгцээ байгаа. Бидэнд ийм нөөц их хэмжээтэй бий. Бид стратегийн нөөцөө ашиглах өөрийн гэсэн төлөвлөгөөтэй. Энэ чиглэлийн хамтын ажиллагааны хэтийн төлөв маш өргөн юм” гэж Кремлийн хэвлэлийн төлөөлөгч Дмитрий Песков өчигдөр сэтгүүлчидтэй уулзахдаа хэлжээ.

Өмнөх өдөр нь буюу Даваа гарагт ОХУ-ын ерөнхийлөгч Владимир Путин бас энэ санааг цухуйлгаж байсан юм.

Тухайлбал ирээдүйн Орос-Америкийн хамтын ажиллагааны хүрээнд төр болон хувийн хэвшлийн оролцоотой хамтарсан төслүүд байх боломжтойг Путин телевизээр ярихдаа дурдаж байв.

Гэхдээ Песков ийм эдийн засгийн хамтын ажиллагааг эхлүүлэхээс өмнө Москва, Вашингтоны харилцааг хэвийн болгохын тулд хийх ажил их байгааг онцолжээ.

“Нэн даруй шийдэх ёстой асуудал бол Украины хямрал. Дараа нь Америкчуудын бас сонирхож байгаачлан худалдаа, эдийн засаг, хөрөнгө оруулалтын асуудлуудыг шийдвэрлэх боломжтой” гэж тэр хэлсэн байна.

Песков цааш нь “Улс төрийн хүсэл зориг харагдсаны дараа газрын ховор элементийн асуудал нээлттэй болно” гэж хэлжээ.

Газрын ховор элемент гэдэг нь орчин үеийн цахилгаан автомашин, гар утас, пуужингийн систем зэрэгт түүхий эд болон ашиглагддаг 17 бүлэг металлын нэр томьёо юм.

АНУ-ын Геологийн Судалгааны Албаны мэдээлснээр Орос улс энэ нөөцөөр дэлхийд Хятад, Бразил, Энэтхэг, Австрали улсуудын дараа тавдугаарт жагсдаг байна.

Эх сурвалж: Reuters