Хоёр өдрийн цэвэрлэгээгээр нийслэл хотоос 4,060 тонн хог хаягдал гарчээ

Сар шинийн баярыг угтсан их цэвэрлэгээ өнгөрсөн амралтын өдрүүдэд буюу хоёрдугаар сарын 22, 23-ны өдрүүдэд нэгдсэн байдлаар нийслэлийн есөн дүүргийн хэмжээнд зохион байгуулагдаж, үр дүнг өнөөдөр танилцууллаа.

Энэ удаагийн их цэвэрлэгээнд нийт 12,752 аж ахуйн нэгж, байгууллагын 34,957 ажилтан, албан хаагч, иргэн оролцож, нийтийн эзэмшлийн 12,036,116 м.кв талбайгаас 4,060.5 тонн хог хаягдлыг цэвэрлэжээ.

Тодруулбал төрийн байгууллагын 3,200 гаруй ажилтан албан хаагч, 11,127 ААНБ-ын 23,397 ажилтан, 1,196 СӨХ-ны 4,860 ажилтан, иргэн, хог хаягдлын үйлчилгээний 68 байгууллагын 3,500 гаруй ажилчин бүх нийтийн их цэвэрлэгээнд оролцсон байна. 

Их цэвэрлэгээний үеэр хийгдсэн ажлууд:

• Байгууллага, аж ахуйн нэгжүүд орчныхоо 50м хүртэлх нийтийн эзэмшлийн зам талбайг цэвэрлэх, байгууллагынхаа хайс хашлага, автобусны буудал, нүхэн болон гүүрэн гарц, хогийн сав, гадна фасад, хаяг, хаягийн байгууламж, үүд довжоог цэвэрлэж, өнгө үзэмжийг сэргээх,
• Гудамж, зам талбайн хог хаягдал, хатсан шарилж ургамлын цэвэрлэгээ,
• Айл өрх, аж ахуйн нэгж байгууллагын хог хаягдлын ачилт, цуглуулалтыг эрчимжүүлэх,
• Гудамж талбайн үүсмэл хогийн цэгүүдийг ачиж, цэвэрлэх,
• Сандал, хогийн сав, хайс хашлага, замын тэмдэг, тэмдэглэгээ, гэрэлтүүлгийн шон, хөшөө, баримлыг цэвэрлэх, засварлах,
• Нийтийн эзэмшлийн гудамж, зам талбайд байршуулсан өнгө үзэмжгүй хаяг, мэдээллийн байгууламжуудыг буулгах, өнгө үзэмжийг сэргээжээ.

 

 

 

Нийслэлийн хэмжээнд бүх нийтийн их цэвэрлэгээг энэ онд зургаан удаа зохион байгуулахаар төлөвлөжээ.