"The MongolZ" баг $1.2 саяын шагналын сантай тэмцээнд түрүүлэх магадлал өндөр байна

Цахим спортын "Counter Strike 2" тоглоомын нэгдүгээр түвшний үнэлгээтэй "PGL Cluj-Napoca 2025" тэмцээн энэ сарын 14-23-н хүртэл Румын улсад зохион байгуулагдах гэж байна.

1.2 сая ам.долларын шагналын сантай уг тэмцээнд манай улсын "The MongolZ" баг дэлхийн чансааны оноогоороо уригдан тоглох юм. Нийт 16 баг хэсгийн шатанд тойргийн журмаар тоглоно. Гурван удаа хожсон найман баг нь Playoffs буюу хасагдах шатанд шалгарна. 

"The MongolZ" эхний тойрогт АНУ-ын Complexity багтай "Во3" (гурван "map"-аар ялагчийг тодруулах) журмаар маргааш 22:00 цагт тоглох хуваарь гарсан байна. 16 багийн тойргийн тоглолтууд ирэх долоо хоногийн Мягмар гараг хүртэл үргэлжилнэ. Ингэснээр шөвгийн наймд өрсөлдөх багууд тодрох юм.

Энэ тэмцээнд түрүүлбэл 400,000 ам.доллар, дэд байранд шалгарвал 187,000 ам.доллар, гуравдугаар байрт 150,000 ам.долларын шагнал өгөхөөр зохион байгуулагчид төсөвлөжээ.

"The MongolZ" багийн түрүүлэх магадлалын тухай...

Цахим спортын hltv.org сайтад байрших мэдээллийг ашиглаж, тус тэмцээнд "The MongolZ"-ийн эсрэг өрсөлдөх багуудын мэдээллийг түүвэрлэн хүргэж байна. 

Тухайлбал Францын "Team Vitality", Украины "Natus Vincere" гэх мэт манай багт хожигдож үзээгүй дэлхийн томоохон багууд энэ тэмцээнийг өнжиж байгаа.

Тэдний гол өрсөлдөгчид нь Европын "FaZe Clan", Германы "MOUZ", Туркийн "Eternal Fire", Оросын "Virtus.pro" гэсэн багууд байх юм. Тэмцээн бүрд өмнөх амжилтаа ахиулж буй "The MongolZ"-ийн хөвгүүд дээрх багуудтай эн тэнцүү өрсөлдөөн үзүүлнэ.

Германы "MOUZ" багийг өнгөрсөн оны Шанхайн дэлхийн аваргын хэсгийн шатанд хожсон боловч шөвгийн наймд хожигдсон. Европын "FaZe Clan" багтай өмнө нь томоохон тэмцээнд учраа таарч байгаагүй.

Энэ тэмцээний хүрээнд анх удаа учраа таарах боломжтой. "FaZe Clan" багийн хувьд дэлхийн хэмжээний тэмцээнүүдэд тогтмол амжилт үзүүлдэг. Манай багтай учраа таарвал аль "map" дээр яаж тоглох нь анхаарал татаж байна. 

Харин Туркийн "Eternal Fire" багийг сүүлийн хоёр учраандаа хожсон. Оросын "Virtus.pro" багийн эсрэг нийт дөрвөн удаа тоглохдоо ердөө нэг хожсон гэх үзүүлэлттэй байна. Гурван удаа хожигдохдоо ихэвчлэн өөрсдийнхөө хамгийн сайн тоглодог "map" дээр ялагдаж байв.

Мөн өнгөрсөн оны Шанхайн дэлхийн аварга Оросын "Team Spirit" баг энэ тэмцээнийг өнжсөн нь манай хөвгүүдийн түрүүлэх магадлалыг өсгөж байгаа юм.

"The MongolZ" багийн хувьд "Nuke map" дээр ялалт байгуулах магадлал 50 хувьтай юм. Харин Ancient, Dust II, Inferno гэсэн гурван "map" дээр хожих магадлал нь 70-аас дээш хувьтай байгаа.

"Counter Strike 2" тоглоомын анхан шатны мэдээлэл...