Э.Хашчулуун: Хүүхдийн эрхийг хамгаалдаг хүмүүс бол уяачид. Олон улсын байгууллага хэзээ ч хичээлд нь хүргэж, хувцас хэрэглэлээр хангахгүй

Гэрэл зургийг MPA агентлагийн онцгой зөвшөөрөлтэйгөөр ашиглав

Монголын морин спорт, уяачдын холбооноос хаврын морин уралдааныг хориглосон шийдвэрийн талаар нэгдсэн байр суурь илэрхийлж, "Монгол ньюс" төвд өнөөдөр хэвлэлийн хурал зохион байгууллаа. 

Монголын морин спорт, уяачдын холбоо "Манай холбоо 30 жилийн түүхтэй байгууллага бөгөөд 21 аймаг, нийслэлийн зургаан дүүрэг, 330 суманд салбар хороодтой. 120 мянган гишүүнчлэлтэйгээр үндэсний хэмжээнд үйл ажиллагаа явуулдаг мэргэжлийн холбоо юм. 

Засгийн газрын 2025 оны 41 дүгээр тогтоолыг хүлээн зөвшөөрөхгүй байгаа. Манай холбоо өнгөрсөн оны арванхоёрдугаар сард их хурлаа хийж, шинэ удирдлагаа томилсон. Энэ хуралд оролцсон 550 төлөөлөгчид хаврын морин уралдааныг сэргээх талаар төр засагтайгаа хамтарч ажиллах хүсэлтийг бидэнд өгсөн.

Энэ хүсэлтийг бид хүлээж аваад хаврын морин уралдааныг сэргээх талаар саналыг Засгийн газарт хүргүүлсэн. Ингэхдээ дөрвөн том асуудлыг дэвшүүлсэн. Үүнд:

• Уралдаанч хүүхдийн аюулгүй байдлын стандартыг шинэчилье. 
• Хурдан морины уралдааны замыг засахдаа хаврын уралдааны онцлогтой нь тулгуурлаж, стандартыг шинэчилье.
• Хурдан морины уралдаанч хүүхдүүдийн эрүүл мэнд, боловсролын асуудалд төр засагтай хамтарч ажиллах, 
• Уралдааныг зохион байгуулахдаа цаг агаарын таатай нөхцөлийг харгалзах гэх мэт.

2025 оны нэгдүгээр сарын 29-нд Засгийн газрын хуралдааны дараа хаврын морин уралдаан зохион байгуулах эрхийг аймаг, нийслэлийн Засаг даргын мэдэлд шилжүүлсэн.

Ингэхдээ дээрх дөрвөн шаардлагыг хангаж, 12-оос дээш насны хүүхдээр унуулах шийдвэр гарсан. Гэвч Засгийн газрын шийдвэр цаасан дээр албажиж гарахдаа хаврын хурдан морин уралдааныг хориглосон. Уралдаан зохион байгуулахдаа 18-аас дээш настай хүнээр морь унуулахаар шийдвэрлэсэн. 

Манай холбоо үндэсний өв соёлыг ирээдүй хойчдоо өвлүүлэхээр ажиллаж байгаа учраас 18-аас дээш настай хүн унасан ямар ч хурдан морин уралдааныг зохион байгуулахгүй гэдгээ албан ёсоор мэдэгдэж байна. Бидний шийдвэр 21 аймаг, нийслэлийн хэмжээнд бүрэн хэрэгжинэ" гэв.

"2019 онд хаврын морин уралдааныг хориглосон боловч 21 аймагт нууц далд хэлбэрээр зохион байгуулагдсаар ирсэн"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Монголын морин спорт, уяачдын холбооны тэргүүлэгч гишүүн Э.Хашчулуун "2019 онд Засгийн газар тогтоол гарч, хаврын морин уралдааныг хориглосон. Өвөл, хаврын уралдаан зохион байгуулахдаа 18 нас хүрээгүй хүүхдээр морь унуулахгүй гэсэн шийдвэр нь судалгаа тооцоогүй байна. 

2019 онд хаврын морин уралдааныг хориглосноос хойш 21 аймагт нууц далд хэлбэрээр зохион байгуулагдсаар ирсэн. Ингэснээр хүүхдийн амь нас эрүүл мэнд эрсдэлд орж байгаа. Хэн гэдэг нь тодорхойгүй зохион байгуулагчтай, замын стандартгүй, уяач нар нийлээд уралдаан зохиосоор ирсэн. 

Засгийн газраас гарсан шийдвэр нь хаврын уралдааныг зохион байгуулалттай болгох, хүүхдийн аюулгүй байдлыг яаж хамгаалах вэ гэдэгт чиглэгдэх ёстой байсан. Гэтэл хаврын уралдааныг 18-аас дээш настай хүн унах ёстой хэмээн өв соёлынхоо эсрэг хагарал үүсгэж байна. Үүнээс болж сошиалд уяач нар хүүхдийн эрхийг дордуулдаг мэт агуулгатай маргаан үүссэн. 

Тиймээс хүүхдийн өөрийн хүсэл зориг, ар гэрийн зөвшөөрлийг авах талаар Засгийн газрын тогтоолд оруулахаар санал хүргүүлж байна. Уралдаанч хүүхдийг иж бүрэн хамгаалах хэрэгслээр хангах, даатгалд хамруулах, эрүүл мэндийн үзлэгийг тодорхой болгох талаар тогтоолд оруулъя. 

Мөн тодорхой ажлын хэсэг гаргаж уралдаанч хүүхдийн туршлага ур чадварыг үнэлж үнэмлэхжүүлье. Ингэхгүй бол тодорхой хүмүүс морь унах чадваргүй айлын нялх хүүхдийг мордуулаад зугаа цэнгэл хийгээд явдаг гэсэн ойлголыг үүсгээд байна" гэв.