Т.Батцогт: Том том хотхон, хорооллууд шоронгийн хамгаалалт авсан юм шиг төмөр хашаатай

Гэрэл зургийг MPA агентлагийн онцгой зөвшөөрөлтэйгөөр ашиглав

Улаанбаатар хотын стандартыг батлуулах хэрэгжилтийг зохион байгуулах журам, зааврыг батлах тухай асуудлыг НИТХ-ын хоёрдугаар хуралдаанаар төлөөлөгчид хэлэлцэв. Энэ үеэр хөндөгдсөн асуудлуудыг хүргэж байна.

Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Т.Даваадалай: Иргэдийн эрүүл мэнд, аюулгүй амьдрах орчныг бүрдүүлэхэд чиглэсэн хотын стандартыг бий болгон хөгжүүлэх зорилтод тусгагдсаны дагуу 2022 онд хотын стандартыг баталж, мөрдүүлээд байна. Энэхүү стандартын хэрэгжилтийг зохион байгуулах журмын төслийг НИТХ-д өргөн барьж байна.

Хотын стандартыг хэрэгжүүлэх журам нь таван бүлэг, 56 заалттай. Хотын стандартыг иргэн, хуулийн этгээд санаачлахаас гадна батлагдсан стандартад нэмэлт өөрчлөлт оруулах, дахин шинэчлэх саналыг гаргана.

Батлагдсан хотын стандартыг салбар чиглэл хариуцсан төр, захиргааны байгууллагын ажилтнууд мөрдүүлнэ.

Хотын стандартын хэрэгжилтэд зөвлөл хяналт тавих үндсэн зохицуулалттай. Зөвлөлийг нийслэлийн Засаг даргын дэргэд 9 хүртэлх гишүүнтэйгээр эдийн засгийн хөгжил дэд бүтэц, ногоон хөгжил, агаар орчны бохирдол, хотын үйлчилгээ зэрэг салбарыг хамруулж, байгуулна. Зөвлөл нь хотын стандартад хяналт тавьж, жил бүр нийслэлийн Засаг даргад танилцуулна. Хоёр жил тутамд хотын стандартад үзлэг хийж, шинэчлэх эсэх дүгнэлтийг гаргана.

Журам батлагдсанаар бүтээн байгуулалтын ажил үйлчилгээний чанар сайжирч, иргэдийн эрүүл, аюулгүй ая тухтай орчинд амьдрах зэрэг нөхцөл бүрдэнэ.

Хот байгуулалт, хотын стандартын газрын дарга Г.Баярсайхан: Монгол Улсын хэмжээнд 6,731 стандарт байдаг. Энэ нь сонгож хэрэглэх стандарт юм.

2022 оны аравдугаар сарын 1-нээс дагаж мөрдөх стандарт гэж хуульд өөрчлөлт оруулсан. Түүнээс хойш Нийслэлийн Стандартын Газар 52 стандарт батлуулсан. Энэ жил таван бүлэг бүхий 16 стандартыг батлуулах гээд журмыг өөрчлөхөөр санал оруулж байгаа нь энэ.

Өмнө нь стандартыг сонгож хэрэглэдэг байсан тул барилгын ажлын даалгавар, зурагт стандарт бараг хэрэглэдэггүй байсан гэж хэлж болно. 52 стандартыг батлуулснаас хойш бүх шатны ажлын даалгавар, скиз зурагт стандартын шаардлага тавьж байна.

Нийслэлийн хяналт, шалгалтын газрын даргын үүргийг түр орлон гүйцэтгэгч С.Энхбаяр: Манай байгууллага 2024 онд байгуулагдаж, барилга байгууламж, дэд бүтэц, хот байгуулалт, газрын харилцаа, өргөх байгууламж, харилцаа холбоо зэрэг 13 чиглэлээр хяналтыг хэрэгжүүлж байгаа.

Нийслэлийн хяналт, шалгалтын газар нь 50 орчим ажилтантай, 23 улсын байцаагч 13 чиглэлээр хяналт тавьж байна. Барилгын чиглэлийн улсын байцаагч дөрөв байсныг найм болж байгаа. Харилцаа холбоо зэрэг нарийн чиглэлийн улсын байцаагчаар нэг хүн авахаар болж байна. Зарим чиглэлд улсын байцаагчгүй, улсын байцаагчтай болно. Боловсон хүчний хувьд хүндрэлтэй байна. Ачаалал ихтэй.

2024 онд 5,000 гаруй өргөдөл гомдол ирж, барилгын хяналтын улсын байцаагч нарт дунджаар 337 өргөдөл, гомдол, төлөвлөгөөт бус хяналт шалгалт ногдсон байгаа. Хяналтуудыг төлөвлөгөөний дагуу хэрэгжүүлж байгаа.

Монгол Улсын татан буугдсан хяналт, шалгалтын байгууллагыг сэргээх тухай НЗДТГ, УИХ, Засгийн газрын ажлын хэсэг байгуулагдаж, удирдлага, зохион байгуулалт, хууль тогтоомжийн эрх зүйн орчныг боловсронгуй болгох төслийг боловсруулж дуусах шатандаа орсон.

НИТХ-ын төлөөлөгч Т.Батцогт: 2018, 2019 онд Улаанбаатар хотод анх удаа стандартын газар байгуулагдаж, дагаж мөрдөх хэд хэдэн стандартыг баталсан юм. Баярсайхан даргаа энэ тухай хэллээ.

Гэвч стандартын хэрэгжилт бодит амьдрал дээр хангалтгүй байгаа. Жишээ нь том том хотхон, хорооллууд шоронгийн хамгаалалт авсан юм шиг төмөр хашаатай. Гэтэл бидний баталсан стандартад ногоон байгууламжаар хайс, хашааг хийх ёстой. Тухайн үед мэргэжлийн хяналтын байгууллагыг татан буулгаж, хяналт, шалгалт хийдэг газар нь асуудалтай болж үлдсэн байна.

Одоо хяналтыг хэрэгжүүлэх нэгж шинээр байгуулагдаж байгаа юм байна. Иргэдийн эрх ашгийг хамгаалах үүднээс өөрсдийн баталсан стандартыг хэрэгжүүлэхэд төлөөлөгчийн хувьд саналуудаа өгнө. Хэн нэгэн даргын лоббид өртөхгүй ажиллана байх гэж найдаж байна. Жишээлбэл эрчим хүчний сайд Б.Чойжилсүрэн том том хорооллууд барьж, тэр нь том том төмөр хашаагаар хамгаалагдчихсан. Өмнөх уул уурхайн сайд Ж.Ганбаатар Энканто гээд том хотхон бариад тусгаарлачихсан.

Иргэд чөлөөтэй нэвтрэх орц, гарц гэж шаардлага тавиад байдаг. Гэтэл эрх мэдэлтэй, дарга нар бодит байдал дээр хууль, дүрэм журмыг хэрэгжүүлэх боломжгүй болгодог нөхцөл байгаа. Үүнийг анхаарч ажиллана биз хэмээн саналаа хэлсэн юм.