Английн фермээс олдсон “тэрбумд нэг олдох” бөмбөрцөг хэлбэртэй өндгийг үнэ хаялцуулан зарна

Английн Девон дахь тахианы фермийн нэг ажилтан маш ховор бөмбөрцөг хэлбэртэй өндөг олжээ.

Үүнийг “тэрбумд нэг тохиох” онцгой ховор олдвор гэж үзэж байна.

Фентон фермийн 57 настай ажилчин Алисон Грин сүүлийн гурван жилийн хугацаанд 42 сая гаруй өндөг цуглуулахдаа ийм төгс бөмбөрцөг хэлбэртэй өндөг огт харж байгаагүйгээ ярьжээ.

Тэрбээр олсон ховор өндгөө гуравдугаар сард Эксетэр хотод болох дуудлага худалдаанд үнэ хаялцуулан зарж, олсон орлогыг нь “Devon Rape Crisis” буяны санд хандивлахаар төлөвлөсөн байна.

“Өндөгнүүд хэлбэрээсээ болоод тодорхой замаар эргэлддэг юм. Гэтэл ганцхан энэ өндөг бусдаасаа өөр байсан нь үнэхээр гайхалтай. Хэнд ч ийм хэлбэртэй өндөг байхгүй. Илон Маск ч ийм өндөггүй байх” гэж Грин ярьжээ.

 

Эксетэр хотын “Bearnes Hampton & Littlewood Auctioneers” дуудлага худалдааны төвийн төлөөлөгч Брайан Гудисон-Блэнкс “Бөмбөрцөг хэлбэртэй тахианы өндөг маш ховор байдаг бөгөөд ийм өндгийг 100 фунт, заримдаа 200 фунтээр авах хүмүүс олддог” гэж ярьсан байна.

Өнгөрсөн сард супермаркетаас санамсаргүй худалдаж авсан өндөгнүүд дотроос ийм бөмбөрцөг хэлбэртэй өндөг олдож байжээ.

Өндгийг олсон Беркшир гүнлэгийн Ламборн хотын оршин суугч Эд Паунел дуудлага худалдаанаас 200 фунт стерлингийн орлого олсноо хүүхэд залуусын сэтгэцийн эрүүл мэндийг дэмжих орон нутгийн буяны байгууллагад хандивласан юм.

2015 онд Эссекс гүнлэгийн Лачиндон дахь Ким Броутоны фермийн тахианаас гарсан бөмбөрцөг хэлбэртэй өндөг eBay онлайн платформд 480 фунтээр зарагдаж байжээ.

Эх сурвалж: The Guardian