Автомашинд Улаанбаатарын серитэй улсын дугаар олгох хүсэлтийг цахимаар авч эхэлж байна

Гэрэл зургийг mpa.mn

Тээврийн хэрэгсэлд Улаанбаатарын серитэй улсын дугаар олгох хүсэлтийг цахимаар авч эхэлж байна.

Улсын дугаар олгох carplate.ulaanbaatar.mn цахим системийг 2024 оны арванхоёрдугаар сарын 30-ны өдөр нээсэн бөгөөд өнөөдрийг хүртэл олон нийтэд танилцуулсан юм. Харин өнөөдрөөс хүсэлтийг албан ёсоор авч эхэллээ. 10:28 цагийн байдлаар уг системд 99 хүсэлт бүртгэгдэж, дараалалд орсон төлөвт байна.

Цахим системд нэвтэрч дугаар авах гэж байгаа тээврийн хэрэгслийн арлын дугаарыг оруулснаар тодорхой үзүүлэлтүүдээр шалгуурын дагуу оноог бодож, эрэмбэлэн харуулна. Ингэхдээ тээврийн хэрэгслийн үйлдвэрлэгдсэн он, жолооны хүрд зэрэг шалгуураар эрэмбэлнэ.

Тухайлбал хөдөлгүүрийн төрөл 20, тээврийн хэрэгслийн үйлдвэрлэгдсэн он 25, жолооны хүрд 55 хүртэл оноогоор эрэмбэлэгдэх юм байна. Сар бүрийн улсын дугаар олголтын хугацаанд эрэмбээр нь дээд тооны хязгаарт багтааж дугаарыг олгох зохицуулалттай.

 

Дугаар захиалахдаа carplate.ulaanbaatar.mn систем рүү И-Монголиагийн ДАН системээр нэвтэрч, Улаанбаатар хотын иргэн гэдгээ баталгаажуулна.

 

 

Статистик  мэдээллээс дурдахад нийслэл хотод бүртгэлтэй нийт 755,889 тээврийн хэрэгслийн 43.95% буюу 332,223-нь хосолсон хөдөлгүүртэй бол суудлын автомашин 584,151 байна.