Э.Ниндэв: Улаанбаатарын дугаар авах гэж байгаа автомашины арлын дугаарыг системд оруулснаар оноог бодож, эрэмбэлнэ
Тээврийн хэрэгсэлд Улаанбаатарын дугаар авах хүсэлт илгээх Carplate цахим системийг арванхоёрдугаар сарын 30-ны өдөр нээж, нэгдүгээр сарын 15-ны өдөр иргэдээс улсын дугаарын захиалгыг албан ёсоор авч эхлэхээр болжээ.
Энэ талаар "Замын Хөдөлгөөний Удирдлагын Төв" ОНӨТҮГ-ын Зөрчил бүртгэлийн хэлтсийн дарга Э.Ниндэв "Улаанбаатар хотод тээврийн хэрэгсэлд шинээр улсын дугаар олгохоор боловсруулагдсан системийг танилцуулж байна.
Тээврийн хэрэгсэлд Улаанбаатарын дугаар шинээр олгох шалгуур, үзүүлэлт батлагдсаны дагуу систем боловсруулагдсан.
Улсын дугаар авах хүсэлт илгээх Carplate цахим системийг арванхоёрдугаар сарын 30-ны өдөр нээх бөгөөд 2025 оны нэгдүгээр сарын 14-ний хооронд иргэн, ААН систем рүү нэвтэрч мэдээллээ шалгах, системтэй танилцах боломжтой.
2025 оны нэгдүгээр сарын 15-ны өдрөөс эхлэн улсын дугаарын захиалгыг албан ёсоор авахаар төлөвлөлөө.
carplate.ulaanbaatar.mn систем рүү И-Монголиагийн ДАН системээр нэвтэрч орж, Улаанбаатар хотын иргэн гэдгээ баталгаажуулж харна.
Системд нэвтэрч орсноор дугаар авах гэж байгаа тээврийн хэрэгслийн арлын дугаарыг оруулснаар тодорхой үзүүлэлтүүдээр шалгуурын дагуу оноог бодож, эрэмбэлэн харуулна. Жишээлбэл тээврийн хэрэгслийн үйлдвэрлэгдсэн он, жолооны хүрд зэрэг шалгууруудаар эрэмбэлэгдэнэ.
Сар бүрийн улсын дугаар олголтын хугацаанд эрэмбээр нь дээд тооны хязгаарт багтааж олгоно.
Иргэдэд улсын болон олон улсын чанартай авто зам ашигласны болон Улаанбаатар хотын товчоодоор орсон, гарсан төлбөрийн үлдэгдэлгүй байх үндсэн шалгуурыг тавина.
Улаанбаатар хотод бүртгэлтэй байгаа нийт тээврийн хэрэгслийн статистикийг систем дээр харуулж байгаа" гэж мэдээллээ.
Нэгдүгээр сарын 15-ныг хүртэл тээврийн хэрэгсэлд Улаанбаатар хотын дугаар олгох carplate.ulaanbaatar.mn системтэй танилцахыг уриаллаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
19 СЭТГЭГДЭЛТЭЙ
|
