Т.Даваадалай: Улаанбаатар хотод арваннэгдүгээр сарын 8-наас тээврийн хэрэгсэлд улсын дугаар шинээр олгохыг хязгаарлана
Импортоор орж ирсэн тээврийн хэрэгсэлд арваннэгдүгээр сарын 1-нээс Улаанбаатарын серитэй шинэ дугаар олгохгүйг мэдээлсэн.
Энэ талаар Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Т.Даваадалай "Агаарын бохирдол, зам тээврийн зөрчил, ослыг бууруулах зорилгоор Улаанбаатар хотын тээврийн хэрэгслийн улсын бүртгэлийн дээд хязгаарыг тогтоох тухай журам арваннэгдүгээр сарын 8-наас хэрэгжиж эхэлнэ.
2023 оны байдлаар Улаанбаатар хот 1.6 сая хүн амтай. Нийт тээврийн хэрэгслийн 39.8%-ийг эзэлж байгаа.
Замын хөдөлгөөний оргил цагийн үеэр тээврийн хэрэгслийн дундаж хурд 7-13км/ц буюу маш удаан болсон. Хөдөлгөөний эзлэхүүнийг замын багтаамжид харьцуулсан олон улсын үзүүлэлт 1.7- 2.2. Түгжрэлийн урт 97.3км-т хүрч байна.
2030 он гэхэд Улаанбаатар хотын хүн ам хоёр саяд хүрч, тээврийн хэрэгслийн тоо 928,000, оргил ачааллын үед тээврийн хэрэгслийн хурд 5км/ц буюу явган хүний хурдад хүрэх, түгжрэлийн урт 200км болох тоон үзүүлэлтүүд гарсан.
Замын түгжрэлийг бууруулахаар метро, Туулын хурдны замын төсөл хөтөлбөрийг хэрэгжүүлэхээр бэлтгэлээ хангаж байгаа.
НИТХ-аас энэ оны хоёрдугаар сард нийслэл хотын тээврийн хэрэгслийн улсын бүртгэлийн дугаарын дээд хязгаарыг 730,000 байхаар тогтоосон. Гэвч өнөөдрийн байдлаар Улаанбаатар хотод 785,000 тээврийн хэрэгсэл бүртгэгдэж, 55,000-аар хэтэрсэн байна. Тиймээс Улаанбаатар хотод тээврийн хэрэгсэлд шинээр дугаар олголтыг хязгаарлах шалгуур үзүүлэлт өнөөдөр батлагдсан. Шалгуур үзүүлэлтэд 10 жилээс хэтэрсэн насжилттай тээврийн хэрэгслийг хасах, жолооны зөв хүрдтэй байх зэргийг тусгасан.
Улаанбаатар хотод арваннэгдүгээр сарын 8-наас тээврийн хэрэгсэлд улсын дугаар шинээр олгохыг хязгаарлана. Ингэснээр түгжрэлийг бууруулах төсөл арга хэмжээг хэрэгжүүлэхэд ач холбогдолтой.
Дугаар олгоход зөв талдаа жолооны хүрдтэй тээврийн хэрэгсэл давуу эрхтэй" гэж мэдээллээ.
Тээврийн хэрэгслийн улсын дугаарын хувьд:
- Дуудлага худалдаагаар зарах 3,642
- Одоо задарсан буюу сул дугаарын нөөц 4,784.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
