Өмнөд Солонгос “хэт хөгширсөн” хүн амтай улс болсныг шинэ тоо баримт харууллаа

Өмнөд Солонгосын 51 сая хүн амын 20 хувь буюу 10.24 сая нь 65 ба түүнээс дээш настай болсныг өчигдөр тус улсын засгийн газраас гаргасан тоо баримт харуулжээ.

НҮБ-ын ангиллаар 65 ба түүнээс дээш настны тоо хүн амын 7-оос дээш хувийг эзэлбэл “aging society” (хөгширч буй нийгэм), 14-өөс дээш хувь бол “aged society” (хөгширсөн нийгэм), 20-оос дээш хувь бол “super aged society” (хэт хөгширсөн нийгэм) гэж үздэг.

2023 онд Өмнөд Солонгос улсад хүүхэд төрөлтийн хувь хэмжээ 0.72 хүрч, дэлхийн улс орнуудаас хамгийн сүүлд жагсах болсон юм.

Эмэгтэйчүүдийн амьдралынхаа турш төрүүлсэн хүүхдийн дундаж тоогоор илэрхийлэгддэг энэ үзүүлэлт ядаж 2.1 байхад хүн амын тоо бууралгүй тогтвортой байдаг. Үүнд гадаадаас ирэх цагаачдын өсөлтийг тооцоогүй юм.

Тус улсын дотоод хэргийн яамнаас гаргасан тоо баримтаас харвал эрэгтэйчүүдийн 18 хувь, эмэгтэйчүүдийн 22 хувь нь 65 ба түүнээс дээш настай болжээ.

Европын олон оронд хүн ам зүйн ижил хямрал нүүрлээд байгаа ч гадаадаас цагаачид авах замаар эдийн засагт үзүүлэх нөлөөг бууруулж чадаж байгаа.

Харин Өмнөд Солонгос, Япон зэрэг Зүүн Азийн өндөр хөгжилтэй орнуудад ингэж чадахгүй байна.

Энэ оны тавдугаар сард Өмнөд Солонгосын ерөнхийлөгч Юн Сүк Ёл хүн амын бууралтыг “үндэсний хэмжээний гамшиг” гэж нэрлээд уг асуудлыг хариуцсан шинэ яам байгуулах саналыг нь дэмжихийг парламентдаа уриалж байжээ.

Үүнд амьжиргааны зардал өссөн, цалин хөлсний өсөлт удааширсан, гэрлэлт, хүйсийн тэгш эрхийн байдалд хандах хүмүүсийн хандлага өөрчлөгдсөн зэрэг олон хүчин зүйл нөлөөлдөг гэж судлаачид үзэж байна.

2022 онд Өмнөд Солонгосын засгийн газар сүүлийн 16 жилийн хугацаанд хүн амын өсөлтөө дэмжихийн тулд $200 гаруй тэрбумыг зарцуулсан ч үр дүн гараагүйг хүлээн зөвшөөрч байв.

Эх сурвалж: CNN