• 12 сарын 18, Лхагва
|
Уншиж байна ...
Зураг
Зураг

"Сэтгэцийн эрүүл мэндийн 1800-2000 утсанд дийлэнхдээ архины шалтгаант сэтгэцийн асуудал, нойрны өөрчлөлт зэрэгтэй холбоотой дуудлага ирдэг"

М.Батчимэг, ikon.mn
2 минутын өмнө
IKON.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

"Нийгмийн сэтгэлзүйн тулгамдаж буй асуудал" үндэсний зөвлөгөөн өчигдөр Төрийн ордонд болсон. Энэ үеэр илтгэл тавьсан судлаачдын илтгэлээс Улсын их хурлын Хэвлэл мэдээллийн газраас мэдээллээ.

“Когнос Интернэйшнл” ХХК-ийн захирал, судлаач Ө.Эрдэнэчимэг “Өсвөр үе, залуусын эрүүл мэнд, зан үйлийн судалгааны тайлан” сэдвээр илтгэл тавьсан байна. 

Тус компани судалгаандаа Монгол Улсын дөрвөн бүсийг төлөөлүүлэн Ховд, Өвөрхангай, Дорноговь, Сүхбаатар аймгууд, нийслэлийн Сүхбаатар, Баянзүрх дүүргийн 15-24 насны хүүхэд, залуусыг хамруулжээ. 

"15-17 насны хөвгүүд хичээл сургууль, үе тэнгийн дээрэлхэлт, бусадтай харьцуулагдах зэргээс стресс авдаг"

  • Судалгаанд оролцогсдын өөрийгөө үнэлэх үнэлэмж дунджаас дээгүүр түвшинд гарсан боловч 33.4 хувь нь амиа хорлох тухай бодож үзсэн ба 34.3 хувь нь амиа хорлохыг оролдсон байна.

  • Хөдөө суманд амьдардаг өсвөр насны охид сэтгэцийн эрүүл мэндийн асуудлаараа бараг ярилцдаггүй, зарим охид төрсөн эгч, итгэж болох найзтай байсан бол ярих байсан ч найзууд нь хэлсэн зүйлсийг нь цааш ярьдаг тул нууцаа дэлгэхийг хүсдэггүй гэжээ.

  • 15-17 насны хөвгүүд хичээл сургууль, үе тэнгийн дээрэлхэлт, бусадтай харьцуулагдах зэргээс стресс авдаг бол
  • 18-19 насны хөвгүүд хайр дурлал, ирээдүйд санаа зовних, сургуульд орох зэргээс стресстэхийн зэрэгцээ үүнийгээ ганцаараа шийдэхийг оролдож, өөрөө шийдвэр гаргах хандлагатай гэсэн дүгнэлт судалгаанаас гарсан байна.

"15-34 насныхны нас баралтын 23.9-28.9 хувийг амиа хорлолт эзэлж байна"

Дараагийн илтгэлийг "Залуус болон насанд хүрэгчдийн сэтгэлзүйн тулгамдсан асуудлын" талаар Анагаахын шинжлэх ухааны үндэсний их сургуулийн Анагаах ухааны сургуулийн Сэтгэцийн эрүүл мэндийн тэнхимийн дэд профессор, доктор Д.Оюунсүрэн тавьж дараах зүйлсийг онцолсон байна.

Тэрбээр, сэтгэцийн эрүүл мэндийн мэдээллийн 1800-2000 дугаарын утсанд ирсэн дуудлагад хийсэн дүн шинжилгээг танилцуулжээ. 

  • Сүүлийн таван жилийн хугацаанд уг утсанд ирсэн нийт дуудлагын 82.5-92.3 хувийг насанд хүрэгчдийн дуудлага эзэлжээ.
  • Тэдгээр дуудлагын дийлэнх хэсгийг архины шалтгаант сэтгэцийн асуудал, нойрны өөрчлөлт, гэр бүлийн асуудал, сэтгэл гутрал, сэтгэл түгшилттэй холбоотой дуудлагууд ирсэн байна.
  • 20-39 насны залуусын дунд сэтгэл түгшилт илүү байдаг бол 20-29 насныхан сэтгэл гутралд илүү автаж байна.
  • Мөн эрчүүдэд дунд зэргийн сэтгэл гутрал илүү илэрдэг бол эмэгтэйчүүдэд хүндэвтэр сэтгэл гутрал илэрч байжээ.
  • Мөн амиа хорлолтын асуудал энэ насныхны сэтгэлзүйн тулгамдсан асуудлуудын нэг болоод байгааг доктор Д.Оюунсүрэн дурдаж, 15-34 насныхны нас баралтын 23.9-28.9 хувийг амиа хорлолт эзэлж байгааг онцолсон юм.