"Зүгээр сууж байгаа хүнийг хэлмэгдүүлэх гээд байвал ерөнхийлөгчид нэр дэвшээд эх орон, ард түмний төлөө алалцсан ч яах вэ дээ"

Гэрэл зургийг MPA агентлагийн онцгой зөвшөөрөлтэйгөөр ашиглав

Улсын Дээд Шүүхийн Хяналтын шатны эрүүгийн хэргийн шүүх Хөгжлийн Банкны гэх хэргийг хэлэлцээд өчигдөр шийдвэрээ гаргасан. 

Ингэхдээ Н.Алтанхуяг, Н.Батбаяр нарыг цагаатгасан анхан болон давж заалдах шатны шүүхийн шийдвэрийг хүчингүй болгож, дахин хэлэлцүүлэхээр шийдвэрлэсэн юм. 

Энэ талаар өнөөдөр сэтгүүлчид УИХ-ын гишүүн Н.Алтанхуягаас байр суурийг нь тодруулахад "Дээд шүүх нь миний ойлголтоор бол хоёр шатны шүүхийн хамаг нарийн ширийнийг үзээд шийдвэрээ гаргаж байгаа. Би тэгэх л байх гэж бодтол буцаалаа гэнэ. Намайг дарамталж байгаа хэлбэр. Анхнаасаа улс төрийн хэрэг юм.

Намайг яагаад Хөгжлийн Банкны хэрэгт оруулсан гэхээр УИХ дээр олон юм донгосдог нөхөр байгаа, наадхаа жаахан дуугүй болгоод, өөр ажилтай болго гэсэн. Сая намайг эд нар хорлосон. 2022, 2023, 2024 он гээд гурван жил Хөгжлийн Банкны хэрэг гэж яваад цагаатсан чинь өмнөх хурдаараа явбал дахиад гурван жил Хөгжлийн Банк гээд явах юм шиг байна.

Би ард түмний ахуй амьжиргаа, улс орны эрх ашиг, тусгаар тогтнолын талаар чөлөөтэй хэлдэг. Тэр нь эрх баригчдад таалагддаггүй юм байна лээ. Эд нар алхам тутамдаа намайг аятайхан яримаар байна, бага яримаар байна гээд элдвийн л юм хэлдэг. Би ард түмний төлөөлөгч учраас ард түмний ахуй амьдрал хүнд хэцүү байхад хүнд хэцүү байна гээд хэлэх ёстой. Би улааныг харж урваж, шарыг харж шарваж, пялдагадаж үзээгүй учраас үнэнийг л хэлдэг" гэв.

Түүнээс "2027 онд болох ерөнхийлөгчийн сонгуультай холбогдуулж, улс төр орлоо гэж үзэж байна уу" гэж сэтгүүлч асуухад "Өчигдрийн шийдвэр бол улайм цайм тийм байна. Н.Алтанхуягт Хөгжлийн Банк гэх юм духан дээр нь наагаад гурван жил чирчихсэн юм чинь дахиад гурван жил чирчихвэл ерөнхийлөгчийн сонгуульд энэ нөхрийг дэвшүүлэхгүй, оруулахгүй шиг л амар сайхан жаргачих болов уу гээд ийм юм хийж байгаа" гэсэн юм. 

Мөн тэрбээр "Ингээд байвал ер нь дэвшсэн ч яах вэ. Надад нэр дэвшээд алаад өгье гэсэн бодол байхгүй байсан. Гэхдээ зүгээр сууж байгаа хүнийг хэлмэгдүүлэх гээд байвал Монгол Улсын ерөнхийлөгчид нэр дэвшээд, энэ улс орон, ард түмний ахуй амьжиргаа, тусгаар тогтнолынхоо төлөө алалцсан ч яах вэ гэж бодогдож байна" гэж байр сууриа илэрхийлэв.