iOS 18.1 хувилбар iPhone-д утасны яриаг бичих боломж нэмэв
Энэ сарын эхээр Apple компани мобайл үйлдлийн систем iOS-ынхаа 18.1 хувилбарыг зах зээлд гаргасан бол энэ долоо хоногт засаж сайжруулсан 18.1.1 дэд хувилбарыг гаргаад байна.
Шинэ хувилбарт Apple Intelligence хиймэл оюуны технологийн эхний боломжууд нэмэгдсэн нь цааш цаашдын хувилбаруудаар улам баяжих юм.
Энэ удаагийн шинэчлэлтээр нэвтэрсэн гол дэвшлүүд нь дуудлага бичих (call recording), зураг цэвэрлэх (clean up), бичсэн текстийг боловсруулах (writing tool) боломжууд болж байна.
Эдгээрээс “writing tool” нь англи хэлтэй ажилладаг тул бидэнд хамгийн хэрэгцээтэй нь “call recording”, “clean up” боломжууд юм.
Дуудлага бичих
Хэн нэгэнтэй утсаар ярихад дэлгэцийн зүүн дээд буланд дууны долгионы дүрс бүхий товч харагддаг болсон байна.
Энэ товчийг дарахад ярилцаж байгаа хоёр хүнд гурван секундийн дараа бичлэг эхлэхийг сануулсан “This call will be recorded” хоолойн мэдэгдэл сонсогддог.
Ингэж эхлүүлсэн бичлэгийг дуртай үедээ “Stop” товчийг даран зогсоож болох ба энэ үеэр бас хоёр талд “This call is no longer being recorded” гэсэн мэдэгдэл сонсогдох юм.
Үүнээс цааш бичихгүйгээр яриагаа үргэлжлүүлж болно.
Ярианы бичлэг Notes аппликэйшн дотор “Call recording” гэсэн нэрээр хадгалагддаг.
Эндээс бичлэгийг тоглуулах, бусдад илгээх, текст хэлбэрт хөрвүүлэх (гэхдээ англи, испани, мандарин, кантон, солонгос хэлнүүд) зэрэг үйлдэл гүйцэтгэж болно.
Зураг цэвэрлэх
Энэ нь өөрийн авсан гэрэл зургаас хүсээгүй хэсгээ цэвэрлэх боломж юм. Тухайлбал өөрийн селфи зургийн ар талд санамсаргүй орсон зүйлсийг огт байгаагүй юм шиг арилгах боломжтой.
Үүний ард хиймэл оюунд суурилсан систем ажиллаж байгаа юм.
Тухайн зургийн засварлах хэсэгт нэвтрэхэд “Clean up” нэртэй товч нэмэгдсэн байгаа.
Үүнийг дарахад зургийн арилгах хэсгийг сонгох баллуур идэвхжих юм.
Дуудлага бичих боломж нь iPhone XS загвараас хойших бүх загварууд дээр ажиллах бол Apple Intelligence хиймэл оюунд суурилсан боломжууд зөвхөн iPhone 15 Pro, iPhone 15 Pro Max, iPhone 16 загварын бүх хувилбарууд дээр ажиллана.
Эх сурвалж: Apple
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
