Удам дамжин УИХ-д сонгогдсон гишүүд

Улсын Их Хурлын (УИХ)-ын 2024 оны ээлжит сонгуулийн дүн гарч, урьдчилсан байдлаар ялалт байгуулсан 126 нэр дэвшигчийг УИХ-ын гишүүнээр сонгогдсонд тооцсон шийдвэрийг СЕХ-ноос гаргасан.

Гишүүнээр сонгогдсон нэр дэвшигчдэд өнөөдөр үнэмлэхийг нь гардуулан өгч, УИХ-ын гишүүн болсныг батламжилна.

Тэгвэл шинэ парламентад сонгогдсон гишүүдээс өмнө нь УИХ-ын гишүүн байсан хүмүүсийн хүүхэд, дүү, ач зээ буюу удам дамжин УИХ-ын гишүүн болж буй гишүүдийг танилцуулж байна.

 

Гэрэл зургийг MPA агентлагийн онцгой зөвшөөрөлтэйгөөр ашиглав

1. Батбаярын Жаргалан

Эдийн засаг хөгжлийн сайд, УИХ-ын гишүүн асан Н.Батбаярын охин Б.Жаргалан 2024 оны УИХ-ын сонгуульд Ардчилсан Нам (АН)-аас нэр дэвшин УИХ-ын гишүүн боллоо.

АН-ын Ардчилсан эмэгтэйчүүдийн холбооны ерөнхийлөгч тэрбээр энэ удаагийн сонгуульд АН-ын жагсаалтын 14 дүгээрт бичигдсэн юм.

 

Гэрэл зургийг MPA агентлагийн онцгой зөвшөөрөлтэйгөөр ашиглав

2. Гончигдоржийн Уянгахишиг

ХҮН намын жагсаалтын эхний зургаан нэр дэвшигч УИХ-ын гишүүнээр сонгогдох болзол хангаснаар тус намын жагсаалтын 4 дүгээрт бичигдсэн Г.Уянгахишиг УИХ-ын гишүүн болов. Түүний аав Р.Гончигдорж УИХ-ын гишүүнээр дөрвөн удаа сонгогдож Монгол Улсын дэд ерөнхийлөгч, УИХ-ын дарга, дэд дарга зэрэг албан тушаалыг хашиж байв.

 

Гэрэл зургийг MPA агентлагийн онцгой зөвшөөрөлтэйгөөр ашиглав

3. Энхбаярын Батшугар

Монгол Улсын гурав дахь ерөнхийлөгч Н.Энхбаярын хүү Э.Батшугар УИХ-ын ээлжит сонгуульд 11-р тойрог буюу Сонгинохайрхан дүүрэгт Монгол Ардын Нам (МАН)-аас нэр дэвшиж, хамгийн олон санал авснаар УИХ-ын гишүүнээр сонгогдлоо.

Ийнхүү тэрбээр УИХ-д 2 дахь удаагаа сонгогдох болзлоо хангасан юм.

 

Гэрэл зургийг MPA агентлагийн онцгой зөвшөөрөлтэйгөөр ашиглав

4. Дуламын Бум-Очир

Ерөнхийлөгчийн соёл, шашны бодлогын зөвлөх Д.Бум-Очир МАН-ын жагсаалтын 15 дугаарт бичигдэн УИХ-ын гишүүн боллоо. Түүний аав Монгол Улсын ардын багш С.Дулам 2000-2004 онд УИХ-ын гишүүнээр сонгогдон ажиллаж байв.

 

Гэрэл зургийг MPA агентлагийн онцгой зөвшөөрөлтэйгөөр ашиглав

5. Ухнаагийн Отгонбаяр

Монгол Улсын ерөнхийлөгч Ухнаагийн Хүрэлсүхийн дүү Ухнаагийн Отгонбаяр УИХ-ын сонгуулийн 6-р тойрог буюу Дорнод, Сүхбаатар, Хэнтий аймагт МАН-аас нэр дэвшиж УИХ-ын гишүүнээр сонгогдов. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

6. Сайнбуяны Амарсайхан

Шадар сайд С.Амарсайхан 2024 оны УИХ-ын ээлжит сонгуульд 13 дугаар тойрог буюу Багануур, Багахангай, Налайх дүүрэгт МАН-аас нэр дэвшиж, УИХ-д хоёр дахь удаагаа сонгогдож байна.

Онцгой байдлын сайд асан түүний ах Сайнбуяны Отгонбаяр 2004-2008 онд мөн УИХ-ын гишүүнээр ажиллаж байв. 

 

Шинэбаярын Бямбасүрэн хуудаснаас ашиглав

7. Шинэбаярын Бямбасүрэн

УИХ-ын сонгуулийн 6-р тойрог буюу Дорнод, Сүхбаатар, Хэнтий аймагт нэр дэвшин сонгогдсон АН-ын ганц нэр дэвшигч бол Ш.Бямбасүрэн. Түүний аав Ц.Шинэбаяр 2008-2012 онд Дорнод аймгаас Улсын Их Хуралд сонгогдон ажиллаж байсан билээ.

 

Пүрэвийн Батчимэг хуудаснаас авч ашиглав

8. Пүрэвийн Батчимэг

УИХ-ын гишүүн асан Г.Батхүүгийн төрсөн дүү П.Батчимэг 2024 оны УИХ-ын ээлжит сонгуульд АН-ын жагсаалтын 12 дугаарт бичигдэн нэр дэвшиж, УИХ-ын гишүүн болов. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

9. Аюушийн Ариунзаяа

Ерөнхий сайд асан П.Жасрайн зээ охин А.Ариунзаяа УИХ-ын ээлжит сонгуульд МАН-аас нэр дэвшиж, УИХ-ын гишүүн боллоо. МАН-ын жагсаалтын 12 дугаарт бичигдсэн тэрбээр 2020-2022 онд Хөдөлмөр, нийгмийн хамгааллын сайдаар ажиллаж байсан юм.