Иранаас олон зуун гадаадын иргэн дүрвэж ирсэн тухай Азербайжан, Армени улсууд мэдээлжээ

Израилийн агаарын цохилт эхэлснээс хойш нийт 700 гаруй гадаадын иргэн Иранаас дүрвэж ирсэн тухай Азербайжан, Армени улсуудын эрх баригчид өчигдөр тус тусдаа мэдээлжээ.

Өвөр Кавказын энэ хоёр улс Ираны баруун хойд бүс нутагтай хил залгадаг юм.

Азербайжантай хил залгадаг хамгийн ойр боомт Ираны нийслэл Тегеранаас 500 км зайд байдаг.

“Израиль, Ираны мөргөлдөөн эхэлснээс хойш дэлхийн 17 улсын 600 гаруй иргэн Азербайжанаар дамжин нутаг буцаад байна” гэж Бакугийн албаны эх сурвалж өчигдөр мэдээлжээ.

Тэднийг Каспийн тэнгисийн эргийн Астара боомтоор дамжуулан Бакугийн олон улсын нисэх буудалд газраар хүргэсэн юм байна.

Дүрвэгсдийн дотор хуучин Зөвлөлтийн бүрэлдэхүүнд байсан Орос, Беларусь, Казахстан, Киргизстан, Тажикистан, Узбекистан улсуудаас гадна Герман, Испани, Итали, Серби, Румын, Португал, АНУ, Арабын Нэгдсэн Эмират, Хятад, Вьетнамын иргэд байжээ.

Азербайжан улс 2020 онд цар тахлын улмаас хаасан боомтоо Ираны дүрвэгсдийг хүлээж авах шаардлагаар түр нээсэн юм байна.

Азербайжаны хөрш Армени улс бас Энэтхэгийн 110 иргэнийг Иранаас нүүлгэн шилжүүлэхэд тусалсныг тус улсын гадаад хэргийн яамны төлөөлөгч өчигдөр Ереван хотод болсон хэвлэлийн хурлын үеэр мэдээлжээ.

Өчигдөр мөн Польш улсын гадаад хэргийн яам Тегеран дахь элчин сайдын яамны зарим ажилтнуудаа Бакугаар дамжуулан татахаар төлөвлөж буйг мэдээлсэн юм.

Дэлхийн хамгийн хаалттай улсуудын нэг Туркменистан голдуу Төв Азийн орнуудын иргэд болох 120 орчим хүнийг Иранаас хүлээн авснаа мэдээлсэн байна.

Израилийн зэвсэгт хүчин Баасан гарагаас эхлэн Ираны нутаг дэвсгэр дэх цэргийн болон цөмийн байгууламжуудад агаараас довтолж эхэлсэн юм.

Үүнийгээ Тегераны дэглэмийг цөмийн зэвсэгтэй болохоос сэргийлэх зорилготой гэж тайлбарлаж байна.

Эх сурвалж: Reuters