Зеленский Евро 2024 тэмцээнд анхны хожлоо авсан Украины үндэсний шигшээ багт баяр хүргэв

Өчигдөр буюу Баасан гарагт Украины хөл бөмбөгийн үндэсний шигшээ баг Европын аварга шалгаруулах тэмцээний хэсгийн тоглолтод Словакийн багийг буулгаж авсан юм.

Германы Дюсселдорф хотод болсон энэ тоглолтод украинчууд өрсөлдөгчөө 2:1 онооны харьцаагаар илүүрхсэн нь тус багийн анхны хожил байлаа.

Ингэснээр анхны тоглолтдоо Румыний багт 3:0 онооны харьцаагаар хожигдоод байсан Украины шигшээ E хэсгээс шалгарах боломжоо хадгалж байгаа юм.

Украины ерөнхийлөгч Володимир Зеленский өчигдөр үндэсний шигшээ багийн тамирчдадаа баяр хүргэж, тэдний хожлыг Оросын эзлэн түрэмгийллийн эсрэг тэмцэлтэй зүйрлэжээ.

“Бие биедээ итгэ! Бие биеэ дэмж! Бие биеийнхээ төлөө тэмц! Энэ бол бидний хүн нэг бүрийг нэгтгэх ёстой зүйл. Одоо бол бид бүгд дор бүрнээ өөр өөрийн талбарт эрх чөлөө, амьдрал, Украины талаар дэлхий нийтийн зөв ойлголтын төлөө тэмцэх цаг юм. Өнөөдөр Украины шигшээ баг яг ийм зүйлийг хийлээ. Үргэлжлүүлээрэй эрчүүдээ!” гэж тэр Телеграм хуудсандаа бичжээ.

Эх сурвалж: Reuters