Тусгай сургалттай сургуулийн орчныг сурагчид өөрсдөө үнэллээ

Гэрэл зургийг MPA агентлагийн онцгой зөвшөөрөлтэйгөөр ашиглав

Монголын тэргэнцэртэй иргэдийн үндэсний хороо” ТББ тусгай сургуулиуд болох 116,  29, 70, МСҮТ-ийн сурагчдын дунд клуб байгуулан хүний эрхийн мэдлэг олгох хөтөлбөр, үйл ажиллагааг хэрэгжүүлдэг. Энэхүү үйл ажиллагааны үр дүнг нэгтгэх зорилготой “Миний дуу хоолой ба Бидний эрх” хүүхдийн форумыг хоёр дахь удаагаа зохион байгууллаа.

Форумд оролцсон сурагчид өөрсдийн сурдаг сургууль болоод дотуур байрныхаа хүртээмжтэй байдлыг үнэлжээ. Ингэхдээ ямар асуудал, бэрхшээл байгааг тодорхойлж сурахын тулд сургалтад хамрагдсан байна. Улмаар сурагчид өөрсдөө үнэлгээний хуудас боловсруулан, судалгаагаа хийсэн байна. Судалгаагаар сургуулийн орчныг 53 үзүүлэлтээр үнэлж эрсдэлийг гурван түвшинд хувааж авч үзжээ. Ингэхэд сургуулийн орчны хүртээмжтэй байдал 72 хувь хангагдсан гэдэг үр дүн гарсан бол долоон үзүүлэлтээр хөгжлийн бэрхшээлтэй хүүхдэд шууд аюултай нөхцөлтэй гэж үнэлэгдсэн байна. Үүнд сургуулийн гадна орчны явган хүний зам, биеийн тамирын заал, заалны хувцас солих өрөөнүүдийн зохицуулалт хөгжлийн бэрхшээлтэй хүүхдийн нөхцөлд тохирохгүй байснаас гадна аюулгүйн гарц, анхны тусламжийн хайрцаг, ариун цэврийн өрөөний эрүүл ахуйн байдлыг сайжруулах хэрэгтэй гэж сурагчид тайландаа дурджээ.

 

Гэрэл зургийг MPA агентлагийн онцгой зөвшөөрөлтэйгөөр ашиглав

Энэ талаар МСҮТ-ийн оюутан Ж.Содхүү “Бид хөгжлийн бэрхшээлтэй хүүхдүүдэд хэрэг болохуйц зөвлөмжүүдийг өөрсдийн хийсэн үнэлгээ, судалгаандаа тулгуурлан боловсруулсан. Үр дүн  болбол манай сургууль дээр траншейн, боржуур олон гэх мэт бага зэргийн асуудал гарсан. Гэхдээ манай сургууль хөгжлийн бэрхшээлтэй хүүхэд сурахад харьцангуй ээлтэй сургууль гэж бодож байна” хэмээн хэлсэн юм. Мөн түүнчлэн тэрбээр “Хөгжлийн бэрхшээлтэй хүүхдүүд нийгмийн харилцаанд орж нээлттэй болох нь маш их боловсрол олгоно. Бусдын бодолд санаа зоволгүйгээр нийгмийн харилцаанд идэвхтэй байж хүмүүстэй харилцаасай гэж хүсэж байна” хэмээн хэлсэн юм. Мөн энэхүү форумд хамрагдаж буй Мэргэжлийн боловсрол, ур чадвар олгох сургуулийн оюутан А.Пүрэвжаргал форумын талаар сэтгэгдлээ хуваалцаад зогсохгүй хөгжлийн бэрхшээлтэй хүүхдүүдийг чадавхжуулах сургалт нэмэгдсэн төдийгүй ирээдүйд сэтгэл зүйч мэргэжлээр их сургуульд сурах зорилготойгоос гадна контент бүтээгч болоод хүмүүст чадаж байна, болж байна, та ч чадна гэх мессэж хүргэхийг хүсдэг тухайгаа хуваалцсан юм.

Түүнчлэн дотуур байрны үнэлгээний хувьд 77 хувь эрсдэлгүй нөхцөлийг бүрдүүлсэн ч аюулгүй гарцын тэмдэглэгээ болон гал унтраах хэрэгслийг хэрхэн ашиглах тухай мэдэхгүй байгаа нь судалгаанаас харагджээ. Эдгээр зөрчлийг арилгахын тулд судалгааны үр дүнд тулгуурлан зөвлөмж гаргасан байна. 

Зөвлөмж

1. Сургуулийн гадна орчны аюулгүй байдлыг сайжруулах

• Сургуулийн бүсэд явган хүний гарцын тэмдэг тэмдэглэгээг тодруулах, хурд сааруулагч, гэрлэн дохио байрлуулах
• Явган хүний замын налууг стандартын дагуу хийх

2. Сургуулийн дотор орчныг сайжруулах

• Хүүхдийн биеийн хөгжил, эрүүл мэнд, чөлөөт цагийг дэмжих зорилгоор зориулалтын талбай, заал, тоглоомын талбай байгуулах
• Хичээлээс гадуурх биеийн тамирын болон чөлөөт цагийн үйл ажиллагааг дэмжих зорилготой ойролцоох ерөнхий боловсролын сургууль, байгууллагын спорт заал, талбайг хамтран ашиглах боломж эрэх
• Сургуулийн дотуур байрны орчинд байрлах аюулгүйн гарц, гал унтраах хэрэгслийн байршил, ашиглах зааварчилгааг ойлгомжтой, хүртээмжтэй хэлбэрээр байршуулах, тогтмол сургалт зохион байгуулах

3. Дотуур байрны орчныг сайжруулах

• Дотуур байрны материаллаг орчныг холбогдох стандарт, шаардлагад нийцүүлэн нөхцөл байдлыг сайжруулах бодлого боловсруулах
• Сургуулийн болон дотуур байрны орчинд гаднын хүн нэвтрэхэд тавигдах хяналт, бүртгэл, хариуцлагын тогтолцоог  тодорхой болгох
• Эцэг эх, багш, ажилтнууд болон сурагчдад цахим хэрэглээтэй холбогдолтой эрсдэл, аюулын талаар ойлголт өгөх, цахим орчны аюулгүй байдал, хувийн мэдээллээ хамгаалах мэдлэг, чадвар олгох сургалт тогтмол орох