“Зууны мэдээ” сонин ESAN цахим санд цахимжиж эхэллээ

 

Монгол улсад Үндэсний Сэтгүүл Зүйн салбар үүсэж хөгжсөний 111 жилийн ойг тохиолдуулан МУ-ын Ерөнхийлөгчийн нэрэмжит ESAN Үндэсний цахим сан болон өдөр тутмын “Зууны мэдээ” сонин хоорондын хамтын ажиллагааны хүрээнд тус сонины 33 жилийн түүхэн архивыг бүрэн цахимжуулах ажил эхэллээ.

Одоогоор 2011 оноос хойших дугаарууд бүрэн цахимжиж ESAN Үндэсний цахим санд байршсан бөгөөд архивын дугааруудыг үе шаттайгаар цахимжуулах юм.

ESAN цахим санд “Зууны мэдээ” сонин байршсанаар бүх цаг үеийн дугааруудаас нарийвчлан хайлт хийх, эш татах, өдөр тутмын шинэ дугаарыг цахимаар хүлээн авч унших зэрэг олон боломж бүрдэж байгаа билээ.

Ташрамд дурдахад ESAN цахим сан хэвлэлийн архивыг цахим сан болгон, олон нийтэд хүртээмжтэй, түргэн шуурхай түгээн дэлгэрүүлэх зорилгын дор 2020 онд Монголын Үнэн сонины 100 жилийн 20 мянган түүхэн дугаарыг цахимжуулж байсан ба цаашид өдөр тутмын болон бусад сонинууд шат дараатайгаар Esan.mn-д бүрэн цахимжиж байрших юм.