Бээжин хот орчин үеийн түүхэндээ хамгийн урт үргэлжилсэн хүйтрэлтийг үзжээ

Хятад улсын нийслэл Бээжин хот орчин үеийн түүхэндээ хамгийн урт үргэлжилсэн цаг агаарын хүйтрэлтийг үзсэн тухай тус улсын хэвлэл өчигдөр мэдээлжээ.

Өчигдөр буюу Ням гарагт тус хотын Наньжяо дүүрэг дэх цаг уурын станц олон хоногийн дараа анх удаа Цельсийн нэмэх хэмийн температур бүртгэсэн тухай Бээжингийн Өдрийн Сонин мэдээлсэн байна.

“Арванхоёрдугаар сарын 11-ний өдөр агаарын температур тэгээс доош хэм зааснаас хойш энэ түвшин 300 гаруй цаг үргэлжлэн хадгалагдсан юм” гэж дээрх сонинд бичжээ.

Энэ нь цаг агаарын температурыг албан ёсоор бүртгэж эхэлсэн 1951 оноос хойших хамгийн урт үргэлжилсэн хүйтрэлт болсон байна.

Уг хүйтрэлтийн үеэр Хятадын хойд хэсгийн хотуудад эрчим хүчний хэрэглээ оргилдоо хүрч, хэд хэдэн удаагийн гэмтэл саатал гарч байв.

Тухайлбал Хэнань мужийн Жяозуо хотын Ванфан цахилгаан станц Баасан гарагт гэмтсэнээс хотын нэг хэсэг халаалтгүй болж, саатал Ням гарагийн шөнө дунд хүртэл үргэлжилсэн байна.

Хэнань мужийн Пуяан, Пиндиншань хотуудад Баасан гарагаас эхлэн ихэнх төрийн өмчийн байгууллага, үйлдвэрүүдийн халаалтыг хязгаарласан нь эмнэлэг, сургууль, айл өрхүүдийн халаалтыг тасалдуулахгүй байх зорилготой арга хэмжээ байжээ.

Энэ сарын эхээр хүйтний эрч чангарч, их хэмжээний цас орсны улмаас Бээжин хотын метроны гол шугамд осол гарч, хэдэн зуун зорчигч хүнд, хөнгөн бэртэж байв.

Эх сурвалж: CNN