Дубай хот 2026 онд агаарын такси үйлчилгээгээ бүрэн ашиглалтад оруулна

Арабын Нэгдсэн Эмират Улсын хамгийн том хот Дубай 2026 онд агаарын такси тээврийн үйлчилгээгээ бүрэн ашиглалтад оруулахаар төлөвлөжээ.

Агаарын таксины зогсоолын дэд бүтцийг байгуулах ажлыг гүйцэтгэж буй Skyports компанийн гүйцэтгэх захирал энэ талаар өнгөрсөн долоо хоногт тус улсын Халиж Таймс сонинд ярьсан байна.

Түүний өгсөн мэдээллээр бол Дубай хот нь агаарын таксины сүлжээг нийтийн тээврийн дэд бүтэцтэй нэгтгэсэн дэлхийн анхны хот болох гэнэ.

Одоо Skyports компани Дубай хотын дөрвөн хэсэгт агаарын таксины газардах, хөөрөх зогсоолыг байгуулж байгаа юм байна.

Эдгээр нь Дубайн олон улсын нисэх буудал, Палм Жумейра хиймэл арлууд, Дубайн төв, Дубай Марина хороолол байх гэнэ.

“Эдгээр буудлууд нь Дубай хотын хамгийн алдартай, хүн ам шигүү суудаг хэсгүүдийг өндөр хурдтай, хүлэмжийн хий ялгаруулдаггүй тээврийн хэрэгслээр холбох юм” гэж Skyports компани мэдээлжээ.

Дубай хотын тэнгэрт зорчих цахилгаан хөдөлгүүртэй агаарын таксинуудыг АНУ-ын Joby Aviation стартап компани зохион бүтээж байгаа юм.

Нисдэг автомашин нь технологийн хамгийн хурдтай хөгжиж буй салбаруудын нэгд тооцогддог. 2035 онд энэ салбарын зах зээлийн хэмжээ $150 тэрбумд хүрнэ гэж судлаачид үздэг юм.

Одоо хувийн хэвшлийнхэн нисдэг автомашин зохион бүтээхээр шаргуу ажиллаж, дэлхийн том хотуудын эрх баригчид замын ачаалал, агаарын бохирдлоо бууруулах шийдлийг идэвхтэй хайж байна.

Бага оврын нисдэг автомашинууд нь цахилгаан хөдөлгүүртэй, дуу чимээ нь ердийн нисдэг тэрэгтэй харьцуулахад маш бага байх юм.

Одоо Нью-Йорк, Лос-Анжелес, Парис зэрэг хотууд агаарын тээвэртэй болох зорилт тавиад ажиллаж байна.

Нөгөө талаас Delta, American, United зэрэг агаарын тээврийн компаниуд хот доторх агаарын тээврийн хэрэгсэл зохион бүтээхээр ажиллаж буй шинэ залуу компаниудад хөрөнгө оруулалтаа нэмэгдүүлсээр байгаа юм.

Эх сурвалж: Business Insider