И.Чулуунболд: Сайханы хөтлийн дүүжин гүүр аялагчдад 06:00-22:00 цагийн хооронд нээлттэй

Сэлэнгэ аймгийн Алтанбулаг сумын нутаг дахь Сайханы хөтөл дүүжин гүүртэй болж, зургаадугаар сарын 24-нөөс үйл ажиллагааг нь эхлүүлжээ.

Энэ талаар Сэлэнгэ аймгийн Сүхбаатар сумын "Өргөн Сэлэнгэ Үйлчилгээ" ОНӨААТҮГ-ын захирал И.Чулуунболдтой утсаар холбогдож, мэдээлэл авлаа.

Тэрбээр "Сайханы хөтлийн дүүжин гүүрийг өнгөрсөн Бямба гарагт ашиглалтад оруулаад байна. Уг гүүр экстрим аялал сонирхдог 16-аас дээш насны иргэдэд 06:00-22:00 цаг хүртэл нээлттэй. Төлбөрийн хувьд нэг хүний 15,000-20,000 төгрөг.

Дүүжин гүүрний зураг төслийг манай байгууллагаас хийгээд иргэдэд нээлттэй болгосон. Өөрөөр хэлбэл энэ гүүрийг иргэд өөрсдийн мөнгөөр хийлгээд орлогоосоо буцаан авах нөхцөлтэйгөөр барьж байгуулж болно гээд бүтээн байгуулалтын ажлыг гүйцэтгэх компанитай холбож өгсөн юм. 51 сая төгрөгийн өртөгтэй гүүр. Гүүрнээс гадна буцаад буух дүүжин рольк/зиплайн/ зэрэг багтсан. Дүүжин гүүр ашиглалтад орсноор 10 гаруй хүн ажлын байртай боллоо.

Гүүрний үйлчилгээг хөрөнгө оруулалт хийж бариулсан иргэн хариуцдаг. Харин аюулгүй ажиллагаанд онцгой байдлын байгууллагаас хяналт тавьж байна.

Сайханы хөтөлд экстрим аяллын үйлчилгээ, кофе шоп, ариун цэврийн байгууламж, хоол үйлчилгээний цэгүүдийг нэмж байна. Жилд 40,000-50,000 аялагч ирдэг. Энэ жил үйлчилгээнүүд нэмэгдсэнтэй холбогдуулан аялагчдын урсгал улам нэмэгдэж байна.

Хоёр хоногийн үүргэвчтэй аяллын маршрутаар Сүхбаатар суманд иргэд вагоноор их ирдэг. Тиймээс аялагчдад үзэж харах зүйлтэй, цай хоолтой, экстрим үйлчилгээнүүдийг үзүүлж дурсамж үлдээхийг зорьж байгаа юм.

Цаашид уулын шүхэр, Орхон, Сэлэнгийн бэлчирийг усан замаар очиж харах боломжийг бүрдүүлэхээр завины үйлчилгээ үзүүлнэ" хэмээн ярилаа.

Сайханы хөтлийн талаар товч танилцуулсан юм.

Сайханы хөтөл нь Сэлэнгэ аймгийн Алтанбулаг сумын нутагт байрладаг. Ардын хувьсгалын түүхтэй холбогдуулаад хиагтыг чөлөөлсөн ардын журамт цэрэг байрлаж байсан газар. Анх жанжин Сүхбаатар уг хөтөл дээр гарч ирээд "Ямар сайхан хөтөл вэ" гэж уулга алдсанаас хойш Сайханы хөтөл гэж нэрлэгдсэн домогтой байна. Үүнээс өмнө Тэмээн хүзүүтийн хөтөл нэртэй байжээ.

Монгол Улсын хамгийн хойд цэгт байрлах уг хөтөл дээрээс Оросын хил, Сэлэнгэ-Орхон голын цутгалыг дээрээс нь харах байгалийн өвөрмөц тогтоцтой.

Хилийн бүсийг 101 дүгээр ангийн застав 24 цагаар хамгаалдаг бөгөөд 2014 онд Сайханы хөтлийн бүсийг Сэлэнгэ аймгийн тусгай хэрэгцээнд авч, аялал жуулчлалын чиглэлээр хөгжүүлэх анхны тогтоолууд нь гарчээ.