Поп од Селин Дион төлөвлөсөн бүх тоглолтоо цуцалжээ
2023-2024 онуудад төлөвлөгдсөн байсан бүх тоглолтоо эрүүл мэндийн шалтгаанаар цуцалж байгааг Канадын поп од Селин Дион өчигдөр мэдэгджээ.
Одоо 55 настай Дион өнгөрсөн оны арванхоёрдугаар сард мэдрэлийн ховор эмгэгтэй болсноо зарлаж байсан юм.
“Та бүхний сэтгэлийг дахин гонсойлгох болсондоо уучлал гуйж байна. Тайзан дээр гарахад бэлэн болох хүртлээ бүгдийг цуцлах шаардлагатай боллоо. Би бууж өгөхгүй, та бүхэнтэй уулзах цагийг тэсэн ядан хүлээж байна” гэж тэр твиттер хуудсандаа бичжээ.
“Because You Loved Me”, “My Heart Will Go On”, “Think Twice” зэрэг олон дууг хит болгосон Селин Дион нь дэлхийн шилдэг эмэгтэй дуучдын нэг юм.
Тэрбээр “Stiff-Person Syndrome” хэмээх мэдрэлийн ховор эмгэгтэй болоод байгаа. Дион онош тогтоогдсоны дараа энэ оны хоёрдугаар сард эхлэх байсан Европын аялан тоглолтоо цуцалсан юм.
Өвчин нь түүний булчингуудыг агшааж, чангалсны улмаас өмнөх шигээ дуулах чадваргүй болсон байна.
Канадын Квебек мужид 14 хүүхэдтэй айлын отгон нь болж мэндэлсэн Дион 12 насандаа урлагийн замналаа эхэлж байжээ.
Тухайн үед ээж нь охиныхоо анхны цомгийг гаргахын тулд байраа зээлийн барьцаанд тавьж байсан гэдэг. Франц хэлээр дуулдаг байсан Дион 1980-аад оны үед англи хэл сурснаар англиар дуулж эхэлжээ.
1997 онд найруулагч Жэймс Камероны “Титаник” киноны дууг дуулсан нь Селин Дионыг алдрын оргилд хүргэсэн юм.
Дараа нь тэр Лас-Вегасын алдарт Цезарийн Ордонд бараг 16 жил тасралтгүй дуулсан байна.
Эх сурвалж: Aljazeera
