Туркийн алдарт тогоочийг дуурайсан эр Вьетнамд “төрийн эсрэг суртал нэвтрүүлэг” явуулсан хэргээр шийтгүүлжээ
Солт Бэй нэрээр дэлхий дахинд алдаршсан Туркийн тогооч Нусрет Гёкчегийн үйлдлийг хуулбарлан дуурайсан тогооч “төрийн эсрэг суртал нэвтрүүлэг” явуулсан хэргээр Вьетнамын шүүхээс таван жилийн хорих ял сонссон байна.
Гоймонтой шөлний ресторан ажиллуулдаг Питер Лам Буй 2021 онд Солт Бэйн давс цацах алдарт хөдөлгөөнийг дуурайн шөлөндөө амтлагч цацаж буйг харуулсан дүрс бичлэгээ сошиал орчинд нийтэлж байжээ.
Өөртөө тэр “Ногоон Сонгино Бэй” гэсэн нэр хүртэл зүүсэн байна.
Гэтэл хэдхэн хоногийн дараа цагдаа нар Да Нан хот дахь гэрт нь ирж байжээ.
Өчигдөр Да Нан хотын шүүх 39 настай Питер Ламд “төрийн эсрэг суртал нэвтрүүлэг” явуулсан хэргээр таван жилийн хорих ял оноосон байна.
Саваагүй, гэм хоргүй үйлдлийнхээ төлөө тэр яагаад ийм хүнд шийтгэл хүлээх болсон нь учиртай.
Ламын видео цацагдахын өмнөхөн Вьетнамын нийгмийг аюулаас хамгаалах яамны сайд Лондон хотод зочлохдоо Солт Бэйн эзэмшдэг “Nusr-Et Steakhouse” ресторанд алтан навчинд ороосон мах зооглож буйг харуулсан дүрс бичлэг тарж байжээ.
24 каратын алтан навчаар ороосон ийм мах $1,000 давсан үнэтэй байдаг тул уг бичлэг цар тахлын хүнд цаг үед амьдарч байгаа Вьетнамын олон нийтийн ширүүн шүүмжлэлтэй тулгарч байсан юм.
Сайд То Лам тэр үед коммунистуудын шүтээн Карл Марксын булшийг эргэхээр Лондонд очоод байжээ.
Тэрбээр Вьетнамын улс төрийн товчооны 16 гишүүний нэг, 2016 оноос хойш нийгмийг аюулаас хамгаалах яамны сайдаар ажиллаж буй нөлөө бүхий албан тушаалтан юм.
Эх сурвалж: AFP
