Тархийг нь булчинтай холбосон төхөөрөмжийн ачаар саажилттай хүн алхаж эхэлжээ

2011 онд дугуйн ослын улмаас саажилттай болсон 40 настай Нидерландын иргэн Герт Ян Оскам тусгай төхөөрөмжийн тусламжтай алхаж эхэлжээ.

Арав гаруй жилийн өмнө болсон ослын улмаас хүзүүгээ хугалсан түүнийг дахин хэзээ ч хөл дээрээ зогсож чадахгүй гэж эмч нар дүгнэж байсан юм.

Харин одоо тэр шинэ төхөөрөмжийн тусламжтай алхаж, шатаар өгсөж чаддаг болжээ.

Швейцарын эрдэмтдийн бүтээсэн “дижитал гүүр” хэмээх төхөөрөмж Оскамд ийм боломж олгосон байна.

Эрдэмтэд саажилттай хүмүүсийг эмчлэх аргыг олон жилийн турш судалж байгаа юм. Өмнө нь тэд товчлуурын тусламжтай саажилттай хүний булчинд гаднаас даалгавар өгч хөдөлгөдөг төхөөрөмж бүтээснээ Оскам дээр туршиж байжээ.

Өөрөөр хэлбэл үүний тусламжтай тухайн хүн өөрийн хүслээр биш, бусдын удирдлагаар хөдөлдөг байв.

Харин энэ удаа тархинд нь суулгасан мэдрэгчийн тусламжтай хүн өөрөө өөрийн хөдөлгөөнийг удирдах боломжтой болжээ.

Тухайлбал тархинд нь суулгасан мэдрэгч Оскамын хүслийг мэдрээд булчинд нь долгион болгон дамжуулснаар хөдөлгөөн хийх боломжтой болсон байна.

“Бид тархи болон хөлийн хөдөлгөөнийг хянадаг нугасны хэсэг хоорондын тасарсан холбоог дижитал гүүрээр нөхөн сэргээж чадлаа” гэж Швейцарын Лозанн хот дахь Холбооны Технологийн Хүрээлэнгийн профессор Грегуар Куртин тайлбарлажээ.

Шинэ төхөөрөмжийг ашиглаж эхэлснээр Оскамын зарим мэдрэлийн судлуудад сэргэх шинж тэмдэг ажиглагдаж эхэлсэн байна.

Тухайлбал 40 гаруй удаагийн дадлагын дараа төхөөрөмж унтраалттай байх үед ч түүний хөл гаднын нөлөөг бага зэрэг мэдэрдэг болжээ.

Арваад жилийн өмнө осолдсон Оскамд ийм үр дүн гарч байгаа бол осолдоод удаагүй өвчтөнүүдэд илүү сайн үр дүнтэй байх боломжтойг эрдэмтэд хэлж байна.

Тэд цаашдаа хөлөөс бусад эрхтний хөдөлгөөнийг удирддаг болгохоор технологио сайжруулах гэнэ. Гарын хөдөлгөөнийг удирдах нь хөлийг удирдахаас илүү нарийн төвөгтэй тул дараагийн шатны хөгжүүлэлт нэлээд хүнд хэцүү байна гэж эрдэмтэд үзэж байна.

Эх сурвалж: The Guardian