"Их Долоо"-гийн уулзалтад оролцохоор Украин улсын ерөнхийлөгч Володимир Зеленский өнөөдөр Хирошима хотод ирлээ.
Түүний онгоц орон нутгийн цагаар 15:30 цаг орчимд газардав.
Энэ нь ерөнхийлөгч Зеленскийгийн хувьд өнгөрсөн оны хоёрдугаар сараас хойш анх удаа Ази тивд хөл тавьж буй тохиолдол болж байна.
Тэрбээр "Их Долоо"-гийн удирдагчидтай тус тусад нь уулзаж магадгүй талаар The Japan Times мэдээлээд буй. Мөн тус хэвлэлд Зеленский "Их Долоо"-г Оросын эсрэг хэрэгжүүлж буй хориг арга хэмжээнүүдээ улам чангаруулахыг уриалахын зэрэгцээ F-16 сөнөөгч онгоц зэрэг зэвсгийн тусламжийг хүлээн авна гэжээ.