"Мод тарих хамгийн ойр газар бол таны хашаа"

Гэрэл зургийг MPA агентлагийн онцгой зөвшөөрөлтэйгөөр ашиглав

Дэлхийн уур амьсгалын өөрчлөлтийн нөлөөллийг бууруулах, ой, усны нөөцийг хамгаалж, нэмэгдүүлэх, экологийн тэнцвэрт байдлыг хамгаалах үүднээс мод тарих, ургуулах, арчлах ач холбогдлыг олон нийтэд таниулан сурталчлах, соён гэгээрүүлэх зорилгоор “Тэрбум мод” үндэсний хөдөлгөөнийг өрнүүлж буй. 

Үндэсний мод тарих өдрүүд жил бүрийн тав болон есдүгээр сарын хоёр дахь долоо хоногийн Бямба гарагт тохиодог байсан бол Монгол Улсын Ерөнхийлөгчийн энэ оны 44 дүгээр зарлигаар жил бүрийн тав, есдүгээр сарын Бямба, Ням гарагийг тэрбум мод тарих үндэсний өдөр болгон зарласан. Ингэснээр бүх нийтээр мод, сөөг тарих, арчлан ургуулах ажилд олон нийтийн оролцоог нэмэгдүүлэх эерэг нөлөөтэй юм.

• доройтсон ойг нөхөн сэргээх,
• цөлжилт, газрын доройтол, хөрсний элэгдсэн эвдрэлийн эсрэг хамгаалалтын зурвас байгуулах,
• хот суурин газарт ногоон байгууламж байгуулах гэсэн гурван зорилгын хүрээнд зохион байгуулагдаж буй.

Өмнө нь 2021 онд “Зөв мод-зөв арчилгаа”, 2022 онд “Байгалиа бүтээе”, 2023 онд “Мод тарьж байгалиа бүтээе”, 2024 онд “Хүн бүр мод тарьцгаая”, “Алтан намар мод тарих “цаг гэсэн аянуудыг улсын хэмжээнд зохион байгуулсан бол энэ жилийн хувьд хот суурин газарт ногоон байгууламж байгуулах тэр дундаа хашаандаа мод тарих, арчлах, ургуулах чиглэлээр “Мод тарих хамгийн ойр газар бол таны хашаа” уриалга гаргаж, иргэд олон нийтэд мэдээлэл бэлтгэн хүргэж байна.

Үндэсний хөдөлгөөн өрнөж эхэлснээс хойш энэ хаврын тариалалтыг тооцохгүйгээр улсын хэмжээнд нийт 100 орчим сая модыг тарьж, ургуулаад байгаа бөгөөд өнгөрсөн онд нийт таригдсан модны ургалтын байдалд дүн шинжилгээ хийхэд 80-85 хувийн ургалттай байгаа гэсэн дүгнэлт гарсан.

Иймд иргэд, байгууллагыг дээрх арга хэмжээнд идэвх санаачилгатай оролцож, Хашаандаа мод тарихыг Экологийн цагдаагийн албанаас уриалж байна.

 

Эх сурвалж: ЦЕГ-ын Урьдчилан сэргийлэх газар