Японы нэг компани хүмүүсийг хямд зардлаар сансарт аялуулах төлөвлөгөөгөө танилцуулав

Японы Саппоро хотод бүртгэлтэй Iwaya Giken стартап компани энэ долоо хоногт агаарын бөмбөлгөөр хүмүүсийг сансрын уудам, агаар мандлын хил хязгаар хүртэл аялуулах төлөвлөгөөгөө танилцуулжээ.

Сансрын аялал жуулчлалын салбар сүүлийн жилүүдэд эрчимтэй хөгжиж байгаа ч энэ нь зардал өндөртэй үйлчилгээ тул хөрөнгө мөнгөтэй хүмүүсийн сонирхдог зүйл болоод байгаа.

Харин Iwaya Giken жирийн хүмүүсийг сансарт аялуулах зорилготой юм.

Тус компани 2012 оноос хойш 1.5 метр өргөн, хоёр хүний суудалтай капсул зохион бүтээж байгаа юм байна. Үүнийгээ гелийн хийгээр дүүргэсэн агаарын бөмбөлгөөр газраас 25 км-ийн өндөр хүртэл хөөргөх ажээ. Энэ нь агаар мандлын стратосферийн давхаргын дунд хэсэгт хүрнэ гэсэн үг.

Суудлын нэг нь нисгэгчид, нөгөө нь аялагчид зориулагдсан байна.

Ямар ч нисэх онгоц хүрэх боломжгүй ийм өндрөөс манай гарагийн бөмбөрцөг хэлбэрийг ямар ч саадгүй ажиглаж болох юм байна.

Олон дахин ашиглагдах капсул нь тал тал руугаа харах боломжтой том цонхнуудтай юм.

Хоккайдо арлын буудлаас хөөргөсөн бөмбөлөг хоёр цагийн хугацаанд дээд өндөртөө хүрэх бөгөөд тэндээ нэг цаг орчим саатсаны дараа буцах ажээ.

Уг бөмбөлөг зөвхөн Япон улсын агаарын орон зайд хөөрч, газар нутгийнх нь дээр аялаад буцах зөвшөөрөлтэй гэнэ.

Аялагч олон сая доллар төлөхгүйгээс гадна тусгай бэлтгэл хангах, онцгой ур чадвар эзэмших шаардлагагүй тул сансрын аяллыг нийтэд хүртээлтэй болгож байгааг Iwaya Giken компанийн гүйцэтгэх захирал Кэйсүкэ Иваяа тайлбарлажээ.

Анхны нислэгийг энэ оны сүүлээр зохион байгуулах ба зардал нь $180,000 орчим болох тооцоо гарсан байна.

Цаашдаа үүнийг хэдэн арван мянгаар хэмжигдэх хэмжээнд хүртэл буулгах зорилготой гэнэ.

Аялахыг хүсэгчдээс энэ оны наймдугаар сарыг дуустал захиалга авах юм байна. Эхний таван аялагчийг аравдугаар сард зарлах ба дараа нь цаг агаарын саатал гарахгүй бол долоо долоо хоногийн зайтай нисгэх ажээ.

 

 

 

 

Эх сурвалж: Business Insider