Б.Мөнхжаргал: Хүмүүс охин гөлгийг гудамжинд хаядгийн улмаас геометр прогрессоор өсөж зэрлэгшсэн, золбин нохой олон болж байна
Зэрлэгшсэн нохой устгалын асуудлаар Улаанбаатар хотын Захирагчийн ажлын алба (УБЗАА)-ны Хөрс, орчны бохирдол, ариутгал хариуцсан мэргэжилтэн Б.Мөнхжаргалаас тодрууллаа.
- Саяхан зэрлэгшсэн нохой янгир барьсан зураг мэдээлэл олон нийтийн сүлжээнд тарсан. Ийнхүү зэрлэгшиж, дархан цаазат амьтад хор хохирол учруулж буй зэрлэг нохдыг устгах ажлыг нийслэлээс хэр давтамжтай зохион байгуулдаг вэ?
- Нийслэлийн хэмжээнд нохой устгалын ажил өдөр тутамд хийгддэг. Үүнийг Улаанбаатар хотын Захирагчийн ажлын албатай гэрээтэй гурван компани зохион байгуулдаг.
Ялангуяа, нохойн ид үржлийн буюу хавар намрын улиралд эрчимжүүлсэн устгал хийдэг юм.
Мөн Богдхан уулын Дархан цаазат газар, Байгаль орчны газар зэрэгтэй хамтран бид 14 хоногт 2-3 удаа явж устгал зохион байгуулдаг. Ийм газруудад зэрлэгшчихсэн нохой байгаа нь үнэн. Устгаад явахаар зугтаж уулын гүн рүү орчихдог учраас машин тэрэг явах боломжгүй тул яах аргагүй алддаг.
Саяхан янгир барьсан зэрлэгшсэн нохойг яг тухайн үед нь шууд устгасан. Түүнээс хойш 2-3 өдөр Богдхан уулаар явж, зэрлэгшсэн нохдыг устгах арга хэмжээ аваад л явж байгаа.
- Золбин нохойн устгалын тоон мэдээллийг өгөх боломжтой юу?
- Арванхоёрдугаар сарын 15-ны байдлаар нийслэлийн хэмжээнд 76,000 орчим золбин нохой устгасан байна.
Жилд ийм хэмжээгээр нь устгаад байхад золбин нохойн тоо буурахгүй байгаа тухай иргэдээс гомдол, асуулт маш их ирдэг. Энэ нь ерөөсөө гэр хороололд тэжээж буй нохойгоо хараа хяналтгүй сул тавьдгаас л үүдэлтэй.
Эр, эм хоёр нохой зургаан жилийн хугацаанд 67,000-72,000 болтлоо өсөж үрждэг гэх судалгааг олон улсын байгууллагаас гаргасан байдаг.
Нэг эм нохой жилд хоёр удаа үржилд орж, үр төлөө гаргах боломжтой. Ингэхдээ нэг удаагийн төрөлтөөр 6-13 гөлөг гаргадаг бөгөөд гаргасан гөлөгнүүдийнх нь 80 хувь орчим нь эм хүйстэй байдаг.
Гэтэл нохой тэжээж байгаа хүмүүс нь охин гөлгийг шууд л гудамжинд гаргаж хаяж байна. Үүний улмаас тэд гудамжинд гарч, геометр прогрессоор өсөж үржсээр бидний ярьдгаар золбин нохой, зэрлэгшсэн нохой олноор бий болоод байгаа юм.
Энэ байдлыг зогсооход иргэдийн хариуцлагыг дээшлүүлэх, нийслэлд байгаа бүх нохойг бүртгэлжүүлэх журмын төслийг боловсруулж байна.
- Гэрийн тэжээвэр нохой, муурын бүртгэлийн тоо баримтыг өмнө нь харж байсан юм байна. Үүнээс өөр гэсэн үг үү?
- Статистикийн газраас жил бүр ийм тооллогыг хийдэг. Гэхдээ энэ нь тоо баримт л болохоос биш яг бүртгэдэг гэсэн үг биш.
Өөрөөр хэлбэл, өөрийн гэсэн бүртгэлийн дугаар, эрүүл мэндийн дэвтэртэй тэжээвэр амьтныг л бүртгэлтэй гэж үзнэ. Харин жил бүрийн арванхоёрдугаар сард статистикийн газраас гаргадаг мал, гэрийн тэжээвэр амьтны тооллого нь бүртгэл гэсэн үг биш. Энэ тооллого одоо дуусах шатандаа орж байгаа буюу энэ жилийн дүн нь хараахан гараагүй байна.
- Тэжээвэр нохой, муураа бүртгэлжүүлье гэвэл ямар бичиг баримт бүртгүүлэх ёстой болно гэсэн үг вэ?
- Дээр дурдсанчлан бид нийслэлийн нутаг дэвсгэрт тэжээвэр нохой, муурыг бүртгэлжүүлэх журмын төсөл боловсруулсан. Нийслэлийн Иргэдийн Төлөөлөгчдийн Хурлаар удахгүй хэлэлцэж батална. Тус журамд бүх нарийн зохицуулалтыг оруулсан байгаа.
Мөн нохой, муур тэжээх харилцааг зохицуулсан хуулийн төсөл УИХ-д өргөн баригдсан байгааг хэлье.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
38 СЭТГЭГДЭЛТЭЙ
|
