П.Сайнзориг: Жагсаалыг албадан тараах Нийслэлийн Засаг даргын захирамж гарлаа

Гэрэл зургийг MPA агентлагийн онцгой зөвшөөрөлтэйгөөр ашиглав

Хууль зүй, дотоод хэргийн яамны Төрийн нарийн бичгийн дарга П.Сайнзориг цаг үеийн асуудлаар мэдээлэл өгч байна.

Тэрбээр "Аливаа зүйлд хүчирхийллийн бус аргаар хандаж, тайван жагсаал хийх хэрэгтэй. Энэ эрхээ эдлэхийн тулд тодорхой хууль тогтоомжийн хүрээнд бүртгүүлж, зохион байгуулж, хууль ёсны шаардлага тавих ёстой. Гэтэл энэ нөхцөл байдал маань тодорхой хэмжээнд хуулиас давах, хүчирхийлэлд шилжих нөхцөл сүүлийн хэдэн цагт ажиглагдаж байна. Иргэдийнхээ тайван замаар жагсаал хийх эрхийг хүндэтгэж байна. Өнөөдрийн жагсаал Үндсэн хуулийн дагуу бүртгэл хийгдээгүй, аюулгүй байдлыг хангах нөхцөл бүрдүүлээгүй байгаа. Энэ эрхийг хуулийн хүрээнд хийхийг уриалж байгаа юм. 

Жагсаалын агуулгыг өөрчлөх сэдэл ажиглагдаж байна. 

Нүүрсний хулгайд шалгагдаж байгаа "Эрдэнэс Тавантолгой" компанийн өмнөх удирдлагууд өмнөх алба хаагчдаа олон нийтийн сүлжээгээр жагсаалд оролцохыг уриалж байна. Мөн бага насны хүүхдийг татан оролцуулах төрийн эрхийн хууль бусаар авах гэмт хэргийн шинжтэй байгаа. 

Шинэ жилийн арга хэмжээнд зориулсан гацуурыг шатаасан иргэдийг шалгахад мансуурах бодис хэрэглэсэн байсан. Далимдуулж хууль бус үйлдэл хийх, хууль бус үйлдлээ далдлах гэж жагсаал хийдэг болоод байна.

Залуусын үзэл бодлоо илэрхийлэх жагсаалыг сүүлийн үед олны анхаарал татсан хэрэгт шалгагдаж байгаа этгээдүүд гуйвуулж, төрийн эрхийг хууль бусаар авахад турхирах, төрийн хамгаалалтад байгаа эд зүйлийг эвдэн сүйтгэх нөхцөл байдлууд үүсээд байна. Төрийн тусгай объектод халдаж эвдэн сүйтгэх нөхцөл байдал үүсээд байна.

Бусад иргэдийн эрхийг зөрчих, амгалан тайван байдлыг алдуулах нөхцөл үүсээд байгаа юм. Иймд Үндсэн хуулийн 16-д заасан эрхээ эдлэхдээ Монгол Улсын ҮАБ-д заналхийлж, нийгмийг хохироохгүйгээр эдлэхийг залуусаасаа, жагсаалд оролцож байгаа иргэдээсээ хүсэж байна. 

Насанд хүрээгүй хүүхдүүд мөн жагсаалд орж байна. Ар гэрийнхэн нь анхаарахгүй бол эмх замбараагүй байдал үүсэх, хатуу биет шидэх байдал гарч байгаа тул иргэд эрүүл мэндээр хохирч болзошгүй байна. Дөрвөн иргэн гэмтэж эмнэлгийн байгууллагад хүрлээ.

Алба хаагчид бэртсэн тохиолдол гарлаа. Иймээс хууль бус үйл ажиллагаанд татагдах орохгүй байхыг уриалж байна. 

Захирамж 19:00 цагт гараад албажаад явж байна. 21:00 цаг өнгөрөөгөөд албадан тараана хэмээн мэдэгдлээ.