Уншиж байна ...

Ц.Билэгтсайхан: Амьсгалын замын цочмог хүнд халдвараар эмнэлэгт хэвтсэн иргэдийн 86% нь хүүхдүүд байна

Ө.Цэлмэг, IKON.MN
2022 оны 11 сарын 25
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Томуугийн өвчлөл улсын хэмжээнд идэвхжилийн түвшинд байгааг ХӨСҮТ-ийн Ерөнхий захирал Ц.Билэгтсайхан өнөөдрийн хэвлэлийн хурлын үеэр хэллээ.

Тэрбээр "Томуугийн өвчлөл Говь-Алтай, Дархан-Уул аймагт улирал хооронд буюу ногоон түвшинд байгаа бол 11 аймагт идэвхжлийн буюу шар түвшинд, найман аймагт алаг цоог дэгдэлтийн түвшинд байна.

Томуу, томуу төст өвчнөөр өвчлөгсдийн 80 хувь нь 15 хүртэлх насны хүүхдүүд бөгөөд тэдгээрийн тал хувийг дөрөв хүртэлх насныхан дангаараа эзэлж байна.

Мөн амьсгалын замын цочмог хүнд халдварын оноштой эмнэлэгт хэвтэж буй иргэдийн 85.7 хувь нь 15 хүртэлх насныхан, тэр дундаа 75 хувь нь дөрөв хүртэлх насныхан байгаа юм.

Одоогоор улсын хэмжээнд томуугийн эсрэг вакцинжуулалт 65 хувьтай үргэлжилж байна. Тодруулбал, бид 214,000 хүүхдэд вакцин хийнэ гэж төлөвлөснөөс 90.7 хувь нь хамрагдсан. Мөн жирэмсэн эхчүүдийн 15.3 хувь, 65-аас дээш насны иргэдийн 53 хувь нь томуугийн вакцин хийлгэсэн байна.

Аймгуудаас улирлын томуугийн вакцинжуулалт Дархан-Уул аймагт 95 хувь, Баянхонгор аймагт 94 хувь, Орхон аймагт 90 хувьтай буюу сайн зохион байгуулж байгаа бол Завхан болон Говьсүмбэр аймагт вакцинжуулалтыг эрчимжүүлэх шаардлага бий" гэв.

Мөн тэрбээр, манай улсад COVID-19 халдварын Омикроны дэд хувилбар бүртгэгдэж, тархалт нь нэмэгдэж байна. Түүнчлэн томуу төст өвчнийг үүсгэгч хэд хэдэн халдвараас гадна томуугийн В хүрээний вирус шинээр тодорхойлогдсон гэдгийг онцоллоо.

Үргэлжлүүлэн "Томуугийн улирал нь арванхоёрдугаар сарын сүүлээс нэгдүгээр сарыг дуустал оргил үедээ хүрээд, гуравдугаар сараас буурдаг зүй тогтолтой. Тиймээс сурагчдын амралтыг урт хугацаагаар байлгах зохицуулалт орж байгаа.

Мөн шинэ жил гэлтгүй олон нийтийн арга хэмжээ нь халдварт өвчнийг ихэсгэхэд шууд нөлөө үзүүлдэг тул хүн бүр хувийн хариуцлагаа чангаруулж, амны хаалт хэрэглэхийг зөвлөж байна" гэсэн юм.

ВИДЕО:

https://www.facebook.com/nccdgov/videos/1275790836549775