"Монгол орноо хогноос салгая" аян аймаг, сумдад үргэлжилж байна
"Монгол орноо хогноос салгая" аян хөдөө орон нутагт үргэлжилж байна.
Байгаль Орчин, Аялал Жуулчлалын сайдын энэ оны наймдугаар сарын 31-ний өдрийн 09 тоот албан даалгаврын дагуу "Усны сан бүхий газрыг бохирдож, хомстохоос хамгаалах" арга хэмжээг хэрэгжүүлж байгаа юм.
Хэнтий аймгийн Бор-Өндөр сумын усны сан бүхий газрын 1.5 тонн хогийг цэвэрлэв
Энэ ажлын хүрээнд Хэнтий аймгийн Бор-Өндөр сумын усны сан бүхий газар, түүний хамгаалалтын бүс орчмын 1.5 га талбайг 40 хүний бүрэлдэхүүнтэй цэвэрлэжээ. Тухайн газраас 1.5 тонн хог хаягдлыг ачиж төвлөрсөн хогийн цэгт хаясан байна. Үүнээс 30 килограмм архины шил, 15 килограмм хуванцар, таван килограмм лаазыг дахивар хог хаягдал авах цэгт өгчээ.
"Монгол орноо хогноос салгая" аян Дундговь аймагт өрнөж байна
Тус аяны хүрээнд Дундговь аймгийн Сайхан-Овоо сумын төв орчмын Онгийн голын ай сав дагуух хоёр тонн хог хаягдлыг тус сумын Ерөнхий боловсролын сургуулийн дунд, ахлах бүлгийн багш, сурагчид болон сумын Засаг даргын тамгын газрын албан хаагчид хамтран цэвэрлэж, хогийн цэгт төвлөрүүлсэн байна.
Орхон аймгийн Хангал голын голдирол дагуух хогийг цэвэрлэх ажлыг зохион байгуулав
Орхон аймгийн Баян-Өндөр, Жаргалант сумын ЗДТГ, аймгийн Хөдөлмөр, халамжийн үйлчилгээний газартай хамтран Хангал голын голдирол дагуух хог хаягдлыг цэвэрлэх ажил зохион байгуулж байгаа юм.
Цэвэрлэгээг Эрдэнэт хаалганаас эхлэн голын голдирол дагуу 20 километр, голын эргээс хоёр тийш тус бүр 50 метр зайд хийж байгаа аж. Онцгой хамгаалалтын бүсэд нийт 30 гаруй хүний бүрэлдэхүүнтэйгээр таван техник хэрэгсэл ажиллаж байна.
Увс нуурын эрэг орчмын хогийг цэвэрлэсэн байна
Увс нуурын ай савын улсын тусгай хамгаалалттай газар нутгийн хамгаалалтын захиргааны мэргэжилтэн, байгаль хамгаалагчид есдүгээр сарын 6, 7-нд Увс нуурын эрэг орчмын хогийг цэвэрлэлээ. Нийт найман тонн хог хаягдлыг хогийн цэгт хүргэжээ.
Мөн энэ сарын сарын 6-нд Увс нуурын Татаал-Цагаан гатлага- Бага нуур- Шар нуур-Элсэн толгой- Нарийн усны давс хүртэл 70 километр явж, хоёр тонн хог хаягдал түүн Увс аймгийн Улаангом сумын төвлөрсөн хогийн цэгт буулгалаа.
Эх сурвалж: Байгаль Орчин, Аялал Жуулчлалын Яам
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
