Н.Тавинбэх: Энэ өвөл цахилгааны хэрэглээ 6-7 хувиар нэмэгдэх ч гэмтэл сааталгүй бүрэн хүчин чадлаараа ажиллавал давж чадна
Аюулгүй байдал, гадаад бодлогын байнгын хорооны хуралдаанаар өвөлжилтийн бэлтгэл ажлын талаарх Уул уурхай, хүнд үйлдвэрийн сайд болон Эрчим хүчний сайд нарын мэдээлэлтэй танилцлаа.
Сайд нарын мэдээлэлтэй холбогдуулан гишүүд асуулт асууж, хариулт авав.
УИХ-ын гишүүн С.Бямбацогт: Энэ өвөл Улаанбаатар хот цахилгааны хязгаарлалт хийж магадгүй, нөхцөл байдал амаргүй байгаа гэдэг зүйл ярьж байгаа. Үүнээс урьдчилан сэргийлэх ямар арга хэмжээ авч байгаа вэ. Хэрэглээг хэмнэх тал дээр салбарын яамнаас ямар бодлого баримталж байна вэ.
Эрчим хүчний сайд Н.Тавинбэх: Өнөөдрийн нөхцөл байдлыг мэргэжлийн хэллэгээр хэлбэр чадлын дутагдалд орчихоод байна. Үйлдвэрлэж байгаагаасаа ихийг хэрэглэж байна гэсэн үг. Цахилгаан эрчим хүчний хэрэглээний хувьд тулчихаад байна. Энэ жилийн тухайд 6-7 хувийн өсөлтийг өвлийн их ачааллын хувьд хангахаар байгаа. Гэхдээ үүнийг дотоодын болоод импортын эрчим хүчний тоноглол бүрэн хүчин чадлаараа ажиллаж байж давна. Ямар нэгэн гэмтэл саатал гарсан тохиолдолд хязгаарлалт хийнэ.
Дулааны эрчим хүчний тухайд маш хүнд байгаа. Улаанбаатар хотын хэмжээнд өнгөрсөн өвөл дулааны эрчим хүчний тооцоот ачаалал 3,166 Гкал/цаг хүрсэн. Гэтэл Улаанбаатар хотын хэмжээнд дулаан үйлдвэрлэдэг эх үүсвэрүүдийн хүчин чадал 2,114 Гкал/цаг. Хүчин чадлаасаа 40 хувиар илүү ажилласан гэсэн үг. Дээр нь энэ жил 414 орчим Гкал/цагийн хүчин чадалтай хэрэглэгч нар холбогдох гэж байна. Эд нар есдүгээр сарын 15-наас холбогдвол нийт хүчин чадлаасаа 50 гаруй хувиар илүү ажиллахаар байгаа.
Үүний гарц нь их тодорхой. Шинэ эх үүсвэр барьж хүндрэлтэй нөхцөл байдлаас гарах. Гэвч шинэ эх үүсвэр ойрын ирээдүйд ашиглалтад орохооргүй байгаа.
Нэг гарц нь хэмнэлт. Хэмнэлт бол хэрэглэгчийн хийх зүйл. Хэмнэлттэй холбоотой хууль эрх зүйн орчны зохицуулалт хангалттай бий. Олон улсад хэмнэлт хийсэн хэрэглэгчийг урамшуулдаг тогтолцоо бий. Харин манайд алдагдалтай борлуулж байгаатай холбоотойгоор урамшууллын арга хэмжээ авч чадахгүй байгаа юм. Өөрөөр хэлбэл, бид хэрэглэгчид эдийн засгийн хөшүүрэг болох арга хэмжээ авч боломжгүй байна.
Ний нуугүй хэлэхэд үнийг бодитоор тогтоовол маш том хэмнэлт авчирна.
УИХ-ын гишүүн Б.Дэлгэрсайхан: Сайншанд руу баригдаж буй шугамын ажил ямар түвшинд явж байна вэ. Тавантолгойн цахилгаан станцын ажил хэзээ эхлэх вэ.
Эрчим хүчний сайд Н.Тавинбэх: Засгийн газрын үйл ажиллагааны хөтөлбөрт Чойр-Сайншандын хооронд одоо байгаа шугам сүлжээний хүчдэлийн түвшинг нэг шатаар нэмэгдүүлэх, хоёр хэлхээтэй болгох асуудлыг тусгасан. Энэ ажлыг Европын сэргээн босголт хөгжлийн банкны санхүүжилтээр хийнэ. Ирэх долоо хоногт энэ зээлийн тусгай хэлэлцээрийг байгуулна.
Тавантолгойн цахилгаан станцыг төр өөрөө барих ёстой. Яагаад гэвэл өнөөдрийг хүртэлх хугацаанд хувийн хэвшлийнхэн 11 цахилгаан станц барихаар болсон ч нэг нь ч ашиглалтад ороогүй байна.
