• 12 сарын 21, Бямба
|
Уншиж байна ...
Зураг
Зураг
ХУУЧИРСАН МЭДЭЭ: 2022/05/17-НД НИЙТЛЭГДСЭН

О.Наранцэцэг: Удаан хугацаагаар дааврын бэлдмэл хэрэглэвэл нүдний болор цайх эрсдэлтэй

П.Зоригт, IKON.MN
2022 оны 5 сарын 17
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Нүдний хараа ба өвчлөлөөс урьдчилан сэргийлэх талаар Улсын Нэгдүгээр Төв Эмнэлгийн (УНТЭ) Нүдний мэс заслын тасгийн их эмч О.Наранцэцэг мэдээлэл өгөв. 

Тэрбээр "Дэлхийн дээр хараа алдалттай 2.2 тэрбум хүн амьдарч байна. 2015 оны судалгаанд дурдсанаар манай улсад хараа алдалтын үндсэн шалтгаан нь болрын цайлт байна. Энэ нь хараа алдалтын 39 хувийг эзэлж байгаа юм. Түүнчлэн нүдний даралт ихсэх, нүдний бүдэгшилт зэрэг өвчин зонхилох шалтгаан болдог. 

Болрын цайлт нь төрөлхийн эсвэл насжилттай холбоотой, гэмтэл болон бусад хүчин зүйлээс үүдэлтэй. Төрөлхийн болрын цайлттай хүүхдийг 4-6 долоо хоногтой байхаас нь хагалгаанд оруулбал хараа алдалтаас урьдчилан сэргийлэх боломжтой.

Харин насжилттай холбоотой болрын цайлт бодисын солилцооны өөрчлөлтэй холбоотой үүсдэг. Түүнчлэн удаан хугацаагаар дааврын бэлдмэл хэрэглэх болон цацраг туяанаас шалтгаалж болор цайх эрсдэлтэй" гэв. 

Нэг нүдний хараа сайн байгаа тохиолдолд нөгөө нүднийхээ харааг муудсаныг анзаарахгүй явсаар өвчлөл хүндэрсэн үед эмнэлэгт хандах үзэгдэл байдаг талаар О.Наранцэцэг эмч ярьсан юм. 
Нүдний глауком өвчний талаар ярихдаа "Глауком  нь эргэж хараа сэргэдэггүй өвчин. Монголд хийсэн судалгаагаар хараа алдахад хүргэх хоёр дахь шалтгаан болж байна. Энэ нь захын харааг алдагдуулж улмаар хурдан хугацаанд даамжрах хандлагатай эмгэг юм. Захын хараа алдагдлыг хүмүүс тэр бүр анзаарахгүй явсаар өвчнөө даамжруулах, хожуу шатанд оношлох нь бий. Дээр дурдсанчлан хос эрхтэн учраас нэг нүдний хараа муудаж байгааг анзаарахгүй, мэдэхгүй явсаар хожуу оношлогдох тохиолдол байдаг" хэмээн ярилаа.