Уншиж байна ...
ХУУЧИРСАН МЭДЭЭ: 2022/01/11-НД НИЙТЛЭГДСЭН

Ж.Чинбүрэн: Зургаа болон түүнээс дээш хүүхэдтэй айлд орон сууцны дэмжлэг үзүүлэх чиглэлийг Засгийн газарт өгч байгаа

Т.Өлзийбаяр, iKon.mn
2022 оны 1 сарын 11
iKon.MN
Зураг зураг
Гэрэл зургийг mpa.mn

УИХ-ын Нийгмийн бодлогын байнгын хороо хуралдаанаар “Монгол хүний удмын сангийн аюулгүй байдлыг хамгаалах, хүн амын өсөлтийг дэмжих талаар авах арга хэмжээний тухай” тогтоолын төслийн эцсийн хэлэлцүүлгийг явууллаа. 

Энэ үеэр УИХ-ын гишүүн, Ажлын хэсгийн ахлагч Ж.Чинбүрэн тогтоолд төсөвтэй холбоотой хоёр зүйл бий гэдгийг хэлэв.  

Тэрбээр "Төслийг анх санаачлахад олон хүүхэдтэй гэр бүлийг дэмжих хүрээнд зургаа болон түүнээс дээш хүүхэдтэй айлд орон сууцны дэмжлэг үзүүлнэ гэж байсан. Тэгвэл үүнийг тооцоод төсөвт суулгаад энэ асуудлыг дэмжих чиглэлийг Засгийн газарт өгч байгаа. 

Төсөв тооцоо орох дараагийн том зүйл нь генетикийн лабораторийн асуудал бөгөөд судалж, төсөвт суулгахыг мөн л Засгийн газарт даалгаж байгаа юм. 

Хүн судлалын салбар үнэхээр зогссон. Анх хүн судлалын институт байж байгаад сүүлдээ сектор, тасаг одоо ганц, хоёрхон хүн энэ салбарыг хариуцаж байна. Монгол Улсын хүн ам зүйн бодлого институтгүй болсон. Тиймээс буцааж сэргээх үүднээс тогтоолд удмын сангийн аюулгүй байдлыг хангах, Монгол хүн судлалын салбарыг сэргээн хөгжүүлэх гэж оруулж өгсөн. Ингэснээр Засгийн газар тогтоолыг хэрэгжүүлэх чиглэлд илүү их оновчтой ажиллаж, төсвийг гаргах болов уу.

Хүн судлалын салбараа хөгжүүлж, Ерөнхийлөгчийн аюулгүй байдлын зөвлөлийн судалгааны стратегийн институтийн дэргэд байлгавал зохимжтой юм уу гэж үзэж байна" гэлээ.