Уншиж байна ...
Зураг
Зураг
ХУУЧИРСАН МЭДЭЭ: 2021/10/19-НД НИЙТЛЭГДСЭН

Цахилгаан эрчим хүч импортолдог Селендум-Дархан агаарын шугамын чадлыг 345 МВт хүртэл нэмэгдүүлэхээр ОХУ-тай тохиролцжээ

Б.МАНЛАЙ, IKON.MN
2021 оны 10 сарын 19
iKon.MN
Зураг зураг
Эх сурвалж: ЭХЯ

Эрчим хүчний дэд сайд М.Баярмагнай ОХУ-д өнгөрөгч долоо хоногт томилолтоор ажиллаж, тус улсын эрчим хүчний салбарын удирдлагуудтай уулзаж, яриа хэлэлцээр хийсэн байна.

Тэрбээр ОХУ-ын эрчим хүчний орлогч сайд Е.Грабчактай албан уулзалт хийж, цахилгаан эрчим хүч импортлон авдаг 220 кВ-ын Селендум-Дархан агаарын шугамын зөвшөөрөгдөх чадлын дээд хэмжээг 245 МВт байсныг 345 МВт хүртэл нэмэгдүүлэх ажлыг 2021 оны 12 дугаар сарын 15-ны өдрийн дотор багтаан хэрэгжүүлэхээр тохиролцжээ.

2021 онд “Эрдэнэтийн ДЦС” ТӨХК-ийн 35МВт-ын өргөтгөл, “Дарханы ДЦС” ТӨХК-ийн 35 МВт-ын турбогенератор №5-ийн засварын ажлыг амжилттай дуусгасан. Ингэснээр 2021-2022 оны өвлийн их ачааллыг хүндрэлгүй давах ач холбогдолтой юм.

Мөн ОХУ-ын Засгийн газрын хөнгөлөлттэй зээлийн хөрөнгөөр Улаанбаатар хотын дулаан, цахилгааны эх үүсвэрийн суурилагдсан хүчин чадлыг нэмэгдүүлэх боломжийн талаар ярилцсан байна.

Мөн үеэр Эрчим хүчний дэд сайд 20 дахь удаагийн “Оросын эрчим хүчний долоо хоног” арга хэмжээнд оролцжээ. Тус арга хэмжээ нь түлш, эрчим хүчний салбарын тулгарч буй асуудлууд болон цаашдын хөгжлийн чиг хандлагын талаар хэлэлцдэг олон улсын томоохон талбар болж чадсан юм. Энэ жил 80 гаруй улсын 2,500 гаруй төлөөлөгч, 204 илтгэгч оролцож, 32 арга хэмжээ зохион байгуулагдсан байна.