Уншиж байна ...
ХУУЧИРСАН МЭДЭЭ: 2021/07/24-НД НИЙТЛЭГДСЭН

АНУ нэмэлт болон хүүхдийн дархлаажуулалтад зориулан 200 сая тун Pfizer вакцин худалдан авчээ

С.Мөнхцэцэг, ikon.mn
2021 оны 7 сарын 24
iKon.MN
Зураг зураг

АНУ-ын засаг захиргаа Pfizer компаниас коронавирусийн эсрэг 200 сая тун вакцин худалдаж авах захиалга өгсөн тухай тус компани Баасан гарагт мэдээлжээ.

Ингэснээр Pfizer компаниас АНУ-ын худалдаж авсан нийт вакцины хэмжээ 500 сая тун болж байна.

Шинээр авсан вакцины 65 сая тунг 12 хүртэл насны хүүхдүүдийн дархлаажуулалтад, үлдсэн хэсгийг хүн амын нэмэлт дархлаажуулалтад ашиглахаар төлөвлөж буй тухай Цагаан ордноос мэдээлжээ.

Pfizer компани вакцинаа хүүхдүүд дээр туршиж байгаа ч АНУ-ын засаг захиргаа хараахан хэрэглэх зөвшөөрөл өгөөгүй байна. Мөн насанд хүрсэн хүн амын дархлаажуулалтад гурав дахь тун шаардлагатайг тус компани зөвлөж байгаа.

Цагаан ордны цар тахлын зөвлөх, доктор Энтони Фаучи “намрын сүүлч, өвлийн эхээр бид зөвшөөрөл өгөх эсэхийг шийдэхэд хэрэг болох хангалттай тоо баримттай болно” гэж ярьжээ.

Covid-19 нь хүүхдүүдийн хувьд эрсдэл багатай гэж үздэг. Хамгийн сүүлд гаргасан мэдээллээр АНУ-д бүртгэгдсэн нас баралтын 0.05 хувь, өвчний хүндрэлийн 3 орчим хувийг 18 хүртэл насны хүүхдүүд эзэлж байжээ.

 

Эх сурвалж: Russia Today